అధికారంలోకి రాగానే ‘నాడు-నేడు’పై విచారణ

తెదేపా రాష్ట్ర అధ్యక్షుడు అచ్చెన్నాయుడు

మాట్లాడుతున్న అచ్చెన్నాయుడు, చిత్రంలో తెదేపా నేతలు

కోటబొమ్మాళి, న్యూస్‌టుడే: అధికారంలోకి వచ్చిన వెంటనే నాడు-నేడు కార్యక్రమంలో ఉపాధ్యాయులను బెదిరించి బిల్లులు తీసుకున్న నాయకులపైనా, నిర్మాణాలు చేయకుండా బిల్లులు పొందిన వారిపైనా సమగ్ర విచారణ చేపట్టనున్నట్లు తెదేపా రాష్ట్ర అధ్యక్షుడు, ఎమ్మెల్యే కింజరాపు అచ్చెన్నాయుడు తెలిపారు. చిన్నబమ్మిడి పంచాయతీ సుబ్బారావుపేట గ్రామంలో శుక్రవారం ఆయన పర్యటించారు. ఈ సందర్భంగా గ్రామస్థులు, విద్యార్థులు తాము ఎదుర్కొంటున్న ఇబ్బందులను అచ్చెన్నాయుడు వద్ద ఏకరవు పెట్టారు. అనంతరం అచ్చెన్నాయుడు మాట్లాడుతూ పార్టీ కార్యకర్తలకు అప్పనంగా ప్రభుత్వ సొమ్ము చెల్లించేందుకే ఆ పనులని, ప్రభుత్వం మారాక పిల్లలు పెరిగారని గొప్పగా చెప్పారని ఇప్పుడు వాస్తవాలు చెప్పగలరా? అని  ప్రశ్నించారు. విద్యా ప్రమాణాలు పెంచడమంటే పాఠశాలలు మూసివేయటం కాదని, ప్రతీ తరగతికి ఓ ఉపాధ్యాయుడిని నియమించి ఏటా డీఎస్సీ తీయాలని ప్రభుత్వాన్ని డిమాండ్‌ చేశారు. కార్యక్రమంలో తెదేపా నాయకులు పాల్గొన్నారు.