ఆ ఖైదీల విడుదలకు చర్యలు

పుదువై ఇన్‌ఛార్జి ఎల్జీ

పంటను పరిశీలిస్తున్న తమిళిసై

చెన్నై, న్యూస్‌టుడే: శిక్షాకాలం ముగిసిన ఖైదీలను విడిపించేందుకు చర్యలు చేపట్టనున్నట్టు పుదుచ్చేరి ఇన్‌ఛార్జి లఫె్టినెంట్‌ గవర్నర్‌ తమిళిసై సౌందరరాజన్‌ తెలిపారు. పుదుచ్చేరి కాలాపట్టిలోని కేంద్ర కారాగారంలో ఖైదీలు నిర్వహిస్తున్న వ్యవసాయ క్షేత్రాన్ని తమిళిసై మంగళవారం సందర్శించారు. ఆమెను జైళ్లశాఖ ఐజీ రవిదీప్‌ సింగ్‌ సాగర్‌ స్వాగతించారు. ఖైదీల మానసిక ఒత్తిడిని పోగొట్టేందుకు, వారిని సచ్ఛీలురుగా చేసేందుకు చేపడుతున్న చర్యలను వివరించారు. జైలుశాఖ అధికారుల ప్రయత్నాలను తమిళిసై అభినందించారు. సంప్రదాయ విధానంలో సేంద్రియ ఎరువులు ఉపయోగించి కూరగాయలు, పండ్లు వంటి రకాలు సాగు చేయడం గురించి తెలుసుకున్నారు. ఖైదీలను అభినందించారు. కార్యక్రమంలో భాగంగా జైలు ప్రాంగణంలో మొక్కలు నాటారు. వసతుల గురించి ఖైదీలను అడిగి తెలుసుకున్నారు. ఈ సందర్భంగా ఆమె విలేకర్లతో మాట్లాడుతూ... ఖైదీలు సాగుచేసిన వ్యవసాయ ఉత్పత్తుల అమ్మకానికి రైతు బజారులో చోటు కల్పించడానికి చర్యలు చేపట్టనున్నట్టు తెలిపారు. శిక్షాకాలం ముగిసిన ఖైదీలను విడుదల చేసేందుకు చర్యలు చేపట్టనున్నట్టు పేర్కొన్నారు. కారైకాల్‌ జైలును నిర్మించడానికి రెండేళ్లు అవుతుందని, అప్పటివరకు ఖైదీలను పుదుచ్చేరి జైలులో సురక్షితంగా ఉంచుతారని తెలిపారు.