అల్పాహార పథకం ఎలా అమలువుతోంది?

పరిశీలించిన తెలంగాణ అధికారులు

పథకం వివరాలు తెలియజేస్తున్న సమన్వయ అధికారి

ఆర్కేనగర్‌, న్యూస్‌టుడే: తమిళనాట అమలవుతున్న ముఖ్యమంత్రి అల్పాహార పథకాన్ని పరిశీలించేందుకు తెలంగాణ రాష్ట్ర అధికారులు చెన్నై వచ్చారు. తెలంగాణ ముఖ్యమంత్రి కార్యాలయ కార్యదర్శి స్మిత సబర్వాల్‌, ప్రభుత్వ గిరిజన సంక్షేమశాఖ కార్యదర్శి క్రిష్టినాచొంగ్తు, విద్యాశాఖ కార్యదర్శి వాకాటి కరుణ, ముఖ్యమంత్రి పేషీ అధికారిణి ప్రియాంక వర్ఘీస్‌, మహిళలు, దివ్యాంగులు, సీనియర్‌ సిటిజన్లశాఖ ప్రత్యేక కార్యదర్శి భారతి హొలికేరి, ఇతర ప్రభుత్వ ఉన్నతాధికారులు పాల్గొన్నారు. గురువారం రాయపురంలోని వంటశాలలో ఆహారం తయారీ, కావాల్సిన వస్తువుల కొనుగోలు, పాఠశాలలకు తరలింపు తదితర విషయాలను అడిగి తెలుసుకున్నారు. ఆహారం రుచి చూశారు. అనంతరం రాయపురం ఆరత్తూన్‌ రోడ్డులోని కార్పొరేషన్‌ ఉర్దు పాఠశాలలో విద్యార్థులకు ఆహారం అందించడాన్ని పరిశీలించారు. రోజుకు ఎంతమంది విద్యార్థులు లబ్ధి పొందుతున్నారు, తల్లిదండ్రులు స్పందనను ఉపాధ్యాయుల వద్ద అడిగి తెలుసుకున్నారు. పథకం సమన్వయ అధికారి ఇళమ్‌భగవత్‌ వారికి అన్ని వివరాలు తెలియజేశారు. విద్యార్థులు పాఠశాలకు అల్పాహారం తినకుండా వస్తున్నందున చదువులో ఆటంకాలు ఎదురవుతున్నాయని, తరగతులు మానేస్తున్నారని ఇక్కడి ప్రభుత్వం గుర్తించింది. ఆ సమస్యలకు పరిష్కారంగా అల్పాహార పథకం ప్రవేశపెట్టింది. ఇటీవల రాష్ట్రవ్యాప్తంగా అన్ని ప్రాథమిక పాఠశాలలకు పథకాన్ని విస్తరింపజేశారు. ఈ పథకం ద్వారా తమిళనాడులో సుమారు 17 లక్షల మంది విద్యార్థులు లబ్ధి పొందుతున్నారు.