భూసమీకరణపై న్యాయ పోరాటం చేస్తాం

రెడ్డిపాలెంలో రైతులతో మాట్లాడుతున్న నాయకులు

రంగంపేట, న్యూస్‌టుడే: జీవో 80 రద్దుకు ఆందోళనలు చేస్తామని, భూసమీకరణపై న్యాయ పోరాటం చేస్తామని డీసీసీ అధ్యక్షుడు నాయిని రాజేందర్‌రెడ్డి అన్నారు. రెడ్డిపాలెంలో ల్యాండ్‌ పూలింగ్‌లో భూములు కోల్పోతున్న రైతులను శుక్రవారం కాంగ్రెస్‌ పార్టీ నాయకులు కలిశారు. రాజేందర్‌రెడ్డి మాట్లాడుతూ రాష్ట్ర ప్రభుత్వ ఖజానా ఖాళీ అయిందని, రైతుల భూములను లాక్కొని స్థిరాస్తి వ్యాపారం చేయాలని చూస్తోందని ఆరోపించారు. పంటలు పండించే వ్యవసాయ భూముల జోలికొస్తే సహించేది లేదన్నారు. సమావేశంలో రైతు ఐక్య కార్యాచరణ సమితి ఉమ్మడి జిల్లా కన్వీనర్‌ బుద్దె పెద్దన్న, పున్నంరెడ్డి, సూర్యప్రకాశ్‌, శ్రీనివాస్‌, వర్దన్నపేట కాంగ్రెస్‌ సమన్వయకర్త నమిండ్ల శ్రీనివాస్‌ తదితరులు పాల్గొన్నారు.