Nellore: ముత్తుకూరు జెన్‌కో థర్మల్‌ విద్యుత్‌ కేంద్రంలో ప్రమాదం.. ఒకరి పరిస్థితి విషమం

వెంకటాచలం: నెల్లూరు జిల్లా ముత్తుకూరు మండలంలోని ఏపీ జెన్‌కో థర్మల్‌ విద్యుత్‌ కేంద్రంలో గురువారం ప్రమాదం చోటు చేసుకుంది. మూడో యూనిట్లోని సీసీఆర్‌ కంట్రోల్‌ రూమ్‌లో విద్యుత్తు షార్ట్‌ సర్క్యూట్‌ కారణంగా ఎలక్ట్రికల్ బ్రేకర్‌ పేలడంతో మంటలు వ్యాపించాయి. దీంతో సమీపంలో పనిచేస్తున్న సురేష్‌, కార్తీక్‌లతో పాటు మరో ఇద్దరు ఉద్యోగులు తీవ్రంగా గాయపడ్డారు.

అప్రమత్తమైన తోటి కార్మికులు క్షతగాత్రులను చికిత్స నిమిత్తం సమీపంలోని ఆసుపత్రికి తరలించారు. అక్కడి నుంచి మెరుగైన వైద్యం కోసం నెల్లూరులోని ప్రైవేటు ఆసుపత్రికి తరలించారు. గాయపడిన వారిలో ఒకరి పరిస్థితి విషమంగా ఉందని వైద్యులు తెలిపారు. జెన్‌కోలో తరచూ ప్రమాదాలు జరుగుతున్నాయని కార్మికులు వాపోతున్నారు. ఘటనపై ముత్తుకూరు పోలీసులు కేసు నమోదు చేసి దర్యాప్తు చేస్తున్నారు.