నీట్‌ ఫలితాలు విడుదల

దిల్లీ: దేశ వ్యాప్తంగా వైద్య కళాశాలల్లో ప్రవేశాల కోసం నిర్వహించిన నీట్‌ పరీక్ష ఫలితాలు విడుదలయ్యాయి. ఈ ఫలితాలను జాతీయ పరీక్షల ఏజెన్సీ (ఎన్‌టీఏ) శుక్రవారం సాయంత్రం విడుదల చేసింది. ఎంబీబీఎస్‌, బీడీఎస్‌ కోర్సుల్లో (2020-21) ప్రవేశాల కోసం దేశవ్యాప్తంగా సెప్టెంబర్‌ 13న జాతీయ అర్హత ప్రవేశపరీక్ష (నీట్‌) నిర్వహించిన విషయం తెలిసిందే.  ఈ పరీక్షకు 14.37లక్షల మందికి పైగా (90శాతం మంది) హాజరయ్యారు.

కరోనా నేపథ్యంలో అన్ని జాగ్రత్తలు తీసుకుంటూ 3,862 కేంద్రాల్లో ఈ పరీక్షను పకడ్బందీగా నిర్వహించారు. సెప్టెంబర్‌ 13న కరోనా నేపథ్యంలో హాజరు కాని విద్యార్థులకు ఈ నెల 14న ప్రత్యేకంగా పరీక్ష రాసే అవకాశం కల్పించారు. తాజాగా ఈ పరీక్ష ఫలితాలను వెబ్‌సైట్‌ ద్వారా అధికారులు శుక్రవారం విడుదల చేశారు.

ఫలితాల కోసం క్లిక్‌ చేయండి

నిరుత్సాహ పడకండి..

ఈ పరీక్షల్లో ఉత్తీర్ణత సాధించని విద్యార్థులెవరూ నిరుత్సాహపడవద్దని కేంద్ర విద్యాశాఖ మంత్రి రమేశ్‌ పోఖ్రియాల్ నిశాంక్‌ విజ్ఞప్తి చేశారు. వారి కోసం ఇతర రంగాల్లో అవకాశాలు ఎదురుచూస్తున్నాయని తెలిపారు. ఒక పరీక్షే మనల్ని నిర్వచించదని, ఆయా రంగాల్లో మీ తెలివితేటలు ఈ దేశానికి ఎంతో అవసరమని తెలిపారు. 

వెబ్‌సైట్‌ మొరాయింపు.. ఆందోళనలో విద్యార్థులు

మరోవైపు, ఫలితాలు విడుదల చేసినప్పటికీ వెబ్‌సైట్‌ మొరాయించడంతో విద్యార్థులు తీవ్ర ఆందోళన వ్యక్తంచేస్తున్నారు. ఈ మేరకు సర్వర్‌ డౌన్‌ అయిందని పేర్కొంటూ కేంద్రమంత్రికి ఫిర్యాదు చేశారు. ఎన్నిసార్లు వెబ్‌సైట్‌ను రిఫ్రెష్‌ చేస్తున్నా ఓపెన్‌ కావడంలేదని పేర్కొంటూ ట్వీట్లు పెడుతున్నారు.