ఫ్యాకల్టీ అసభ్యంగా ప్రవర్తిస్తున్నారు.. తాడేపల్లిగూడెం నిట్‌లో విద్యార్థుల ఆందోళన

తాడేపల్లిగూడెం: పశ్చిమగోదావరి జిల్లా తాడేపల్లిగూడెంలోని నేషనల్ ఇన్‌స్టిట్యూట్ ఆఫ్ టెక్నాలజీ (నిట్‌)లో విద్యార్థులు ఆందోళనకు దిగారు. బయోటెక్నాలజీ విభాగానికి చెందిన ఫ్యాకల్టీ అసభ్యంగా ప్రవర్తిస్తూ వేధిస్తున్నాడని విద్యార్థులు ఆరోపించారు. ఈ నేపథ్యంలో నిట్‌ అడ్మినిస్ట్రేషన్‌ కార్యాలయం వద్ద విద్యార్థులు బైఠాయించారు. అతడిపై ఎన్నిసార్లు ఫిర్యాదు చేసినా హెచ్‌ఓడీ పట్టించుకోవడం లేదని.. అందుకే తరగతులను బహిష్కరించి ఆందోళనకు దిగినట్లు చెప్పారు. అతడితో బహిరంగ క్షమాపణ చెప్పించి విధుల నుంచి తొలగించాలని విద్యార్థులు డిమాండ్‌ చేశారు. విద్యార్థుల ఆందోళనతో నిట్‌లో గందరగోళ పరిస్థితి నెలకొంది. మరోవైపు నిట్‌ ప్రాంగణంలోకి ఇతరులు ఎవరూ ప్రవేశించకుండా సెక్యూరిటీ అడ్డుకోవడంతో అక్కడ ఘర్షణ వాతావరణం నెలకొంది.