Budget: బడ్జెట్‌పై అసంతృప్తి.. రంగంలోకి భాజపా ఎంపీలు!

దిల్లీ: ఇటీవల కేంద్ర ప్రభుత్వం ప్రవేశపెట్టిన బడ్జెట్‌పై వివిధ వర్గాల నుంచి అసంతృప్తి వ్యక్తమవుతోంది. దీంతో భాజపా సర్కార్‌ నష్టనివారణ చర్యలు చేపట్టింది. బడ్జెట్‌లో ఉన్న సానుకూల అంశాలను, ప్రయోజిత విషయాలను ప్రజలకు వివరించాలని నిర్ణయించింది. ఈ మేరకు భాజపా ఎంపీలు, జాతీయ నాయకులను రంగంలోకి దింపుతోంది. 

ఎంపీలు తమ పార్లమెంట్‌ నియోజకవర్గంలోని ప్రజలకు బడ్జెట్‌లోని అంశాలను అర్థమయ్యేలా వివరించాలని భాజపా అధిష్ఠానం సూచించింది. దీంతో వారంతా ఫిబ్రవరి 5, 6, 12, 13 తేదీల్లో మీడియా సమావేశాలు ఏర్పాటు చేయబోతున్నారు. బడ్జెట్‌లో కీలక అంశాలను, దేశాభివృద్ధికి ప్రభుత్వం రచించిన ప్రణాళికలను ప్రజలకు వివరించనున్నారు. బడ్జెట్‌లోని ప్రధానమైన పథకాలపై ప్రజలతో చర్చించేందుకు 15 రోజులపాటు వీడియో కాన్ఫరెన్స్‌లు నిర్వహించాలని కూడా భాజపా భావిస్తోంది. అంతేకాదు, బడ్జెట్‌ను స్థానిక భాషల్లోకి తర్జుమా చేసి భాజపా అధికారిక వెబ్‌సైట్‌లో పొందుపర్చనుంది. సోషల్‌మీడియాలోనూ బడ్జెట్‌ ప్రతులను పోస్టు చేయనుంది.

కేంద్ర ప్రభుత్వం ఈ సారి బడ్జెట్‌లో కొన్ని కీలక నిర్ణయాలు తీసుకుంది. డిజిటల్‌ యూనివర్సిటీ, డిజిటల్‌ కరెన్సీని ప్రవేశపెట్టనున్నట్లు పేర్కొంది. అలాగే, రసాయన రహిత వ్యవసాయం దిశగా అడుగులు వేయనున్నట్లు వెల్లడించింది. భారత్‌ ఇప్పటికే స్వావలంబన దేశంగా మారిందని, ఈ బడ్జెట్‌ కేవలం ఆధునిక భారతావనిని నిర్మించడం కోసమేనంటూ ప్రధాని మోదీ బడ్జెట్‌ను ఉద్దేశించి వ్యాఖ్యానించిన విషయం తెలిసిందే.