Mekedatu: వరుస కరోనా కేసులు..కర్ణాటకలో ‘మేకెదాటు’ పాదయాత్ర నిలిపివేత

బెంగళూరు: కర్ణాటకలో వివాదాస్పదంగా మారిన ‘మేకెదాటు’ పాదయాత్రను నిలిపేస్తున్నట్లు కాంగ్రెస్‌ పార్టీ గురువారం ప్రకటించింది. మేకెదాటు ప్రాజెక్టు విషయంలో భాజపా ప్రభుత్వాన్ని నిలదీసేందుకు కాంగ్రెస్‌ పార్టీ ఈ కార్యక్రమం చేపట్టింది. అయితే, ఇందులో పెద్దఎత్తున కరోనా కేసులు బయటపడుతుండటం కలకలం రేపుతోంది. ఈ కార్యక్రమ ప్రారంభోత్సవంలో పాల్గొన్న రాజ్యసభ ప్రతిపక్ష నేత మల్లికార్జున ఖర్గే, సీనియర్‌ నేత వీరప్ప మొయిలీ తదితరులకు తాజాగా పాజిటివ్‌గా నిర్ధారణ అయింది. రాష్ట్ర ప్రతిపక్ష నేత సిద్ధరామయ్య, బెంగళూరు మాజీ మేయర్ మల్లికార్జున్‌, ఎమ్మెల్యే లక్ష్మి తదితరులకూ లక్షణాలు బయటపడ్డాయి. ఈ నేపథ్యంలో.. పాదయాత్రను నిలిపేస్తున్నట్లు పార్టీ నేతలు గురువారం ప్రకటించారు. పార్టీ అగ్ర నేత రాహుల్ గాంధీ పిలుపు మేరకు ఈ నిర్ణయం తీసుకున్నట్లు సమాచారం. అయితే, కేసులు తగ్గుముఖం పట్టిన తర్వాత పునః ప్రారంభిస్తామని చెప్పారు.

ఒమిక్రాన్‌ వ్యాప్తి చెందుతున్న ప్రస్తుత తరుణంలో కొవిడ్‌ నిబంధనలు ఉల్లంఘిస్తూ.. వందలాదిమంది ఈ ర్యాలీలో పాల్గొంటుండటంపై పెద్దఎత్తున విమర్శలు వస్తోన్న విషయం తెలిసిందే. భాజపా నేతలు దీన్ని ‘సూపర్ స్ప్రెడర్’ ర్యాలీగా అభివర్ణిస్తూ వస్తున్నారు. ఈ క్రమంలోనే నిబంధనలు ఉల్లంఘించారంటూ కాంగ్రెస్‌ రాష్ట్ర అధ్యక్షుడు డీకే శివకుమార్, రాష్ట్రంలో ప్రతిపక్ష నేత సిద్ధరామయ్య సహా 60 మందిపై కేసులూ నమోదయ్యాయి. స్థానికంగా కరోనా పరిస్థితుల దృష్ట్యా.. ఈ ర్యాలీని వెంటనే ఆపాలంటూ ఆ రాష్ట్ర సీఎం బసవరాజ్‌ బొమ్మై.. కాంగ్రెస్‌కు లేఖ సైతం రాశారు. ఇదిలా ఉండగా.. ఈ పాదయాత్రకు ఎందుకు అనుమతి ఇచ్చారని? దాన్ని ఆపేందుకు ఎందుకు చర్యలు తీసుకోలేదని కర్ణాటక హైకోర్టు బుధవారం రాష్ట్ర ప్రభుత్వాన్ని ప్రశ్నించింది. ఈ ర్యాలీకి అనుమతి తీసుకున్నారా? కొవిడ్ నిబంధనలు పాటిస్తున్నారా? అంటూ రాష్ట్ర కాంగ్రెస్ నేతలనూ ప్రశ్నించింది. ఇరుపక్షాలు శుక్రవారంలోగా వివరణ ఇవ్వాల్సి ఉంది.