రైలు టికెట్ల బుకింగ్‌కు ఏజెంట్లు ఉండరిక

దిల్లీ: ప్రైవేటు విక్రేతలు, ఏజెంట్లు రైలు టికెట్లు బుక్‌ చేయకుండా నిషేధం విధించే అంశాన్ని పరిశీలిస్తున్నామని రైల్వే శాఖ మంత్రి పీయూష్‌ గోయల్‌ అన్నారు. లోక్‌సభలో శుక్రవారం రైల్వేశాఖకు సంబంధించిన చర్చ సందర్భంగా ఆయన ఈ వ్యాఖ్యలు చేశారు. టికెట్లను పెద్ద ఎత్తున బుక్‌ చేసేందుకు వివిధ సాఫ్ట్‌వేర్లు ఉపయోగించి కొందరు వ్యక్తులు అక్రమాలకు పాల్పడుతున్నారని గోయల్‌ తెలిపారు. అలాంటి వారిపై చర్యలు తీసుకుంటున్నామని,  వారిని అరెస్ట్‌ చేస్తున్నామని చెప్పారు. ఎక్కువ మంది ప్రజలు తమ మొబైళ్లలోనే టికెట్లు బుక్‌ చేసుకుంటే ప్రైవేటు ఏజెంట్ల అవసరం ఉండదని గోయల్‌ అన్నారు. ఎవరికైతే అలాంటి సేవలు అవసరమవుతాయో ప్రభుత్వం నడిపే సేవా కేంద్రాలను సంప్రదించొచ్చని చెప్పారు.