ఆ టికెట్లన్నీ రద్దు: రైల్వేశాఖ

న్యూదిల్లీ: కరోనా వైరస్‌ వ్యాప్తికి అడ్డుకట్ట వేసే క్రమంలో భాగంగా దేశవ్యాప్త లాక్‌డౌన్‌ ప్రకటించిన సంగతి తెలిసిందే. మూడోసారి ప్రకటించిన లాక్‌డౌన్‌ మే 17వ తేదీతో ముగియనుంది. ఈ నేపథ్యంలో జూన్‌ 30వ తేదీ వరకూ బుక్‌ చేసుకున్న అన్ని రైల్వే టికెట్లను రద్దు చేస్తున్నట్లు రైల్వేశాఖ ప్రకటించింది. జూన్‌ 30వ తేదీలోగా ప్రయాణించడానికి వీలుగా మార్చి 25వ తేదీ కన్నా ముందు బుక్‌ చేసుకున్న టికెట్లన్నీ రద్దు అవుతాయని తెలిపింది. టికెట్ల సొమ్ము తిరిగి ప్రయాణికుల ఖాతాల్లో జమ అవుతుందని వెల్లడించింది.

అయితే, వలస కూలీలను సొంతు ఊళ్లకు చేర్చేందుకు ఏర్పాటు చేసిన శ్రామిక్‌ ప్రత్యేక రైళ్లలో బుక్‌ చేసుకున్న టికెట్లు రద్దు కావు. అదే విధంగా ఇటీవల ప్రారంభించిన 15 ప్రత్యేక రైళ్లకు సంబంధించిన టికెట్లకు ఇది వర్తించదు. ప్రస్తుతం ఐఆర్‌సీటీసీలో టికెట్లు బుక్‌ చేసుకునే ప్రతి ప్రయాణికుడి గమ్య స్థానాల చిరునామాను కూడా సేకరిస్తున్నారు. దీని వల్ల ప్రయాణికులు ఎక్కడ ఉంటారో సులభంగా గుర్తించవచ్చు. ఈ మేరకు ఆన్‌లైన్‌ రిజర్వేషన్‌లో మార్పులు చేశారు.

లాక్‌డౌన్‌ 4.0 మరిన్ని సడలింపులు ఉంటాయా?

ప్రస్తుతం విధించిన మూడో లాకౌడౌన్‌ మే 17వ తేదీతో ముగుస్తుంది. ఇప్పటికే లాక్‌డౌన్‌ 4.0 గురించి ప్రధాని నరేంద్రమోదీ సూచన ప్రాయంగా చెప్పారు. కొన్ని నిబంధనలతో దీన్ని అమలు చేయనున్నట్లు వెల్లడించారు. అందుకు సంబంధించిన విధి విధానాలను మే 18వ తేదీ కన్నా ముందే వెల్లడిస్తామని చెప్పారు. ఇప్పటికే 15 ప్రత్యేక రైళ్లను నడుపుతున్నారు. బస్సులు నడిపే విషయంలో ప్రస్తుతం చర్చలు జరుగుతున్నాయి. తెలుగు రాష్ట్రాల్లో ఈ మేరకు బస్సు సీటింగ్‌లో మార్పులు చేస్తున్నారు. 14రోజులు క్వారంటైన్‌లో ఉండేందుకు ఇష్టపడేవారు హైదరాబాద్‌ నుంచి ఏపీకి రావొచ్చని ప్రభుత్వం వెల్లడించింది. ఈ మేరకు ప్రయాణికులు దరఖాస్తు చేయాల్సి ఉంటుంది. మరి ప్రజా రవాణాకు ఇంకెలాంటి నిర్ణయాలు తీసుకుంటారో వేచి చూడాలి.