సవ్యసాచి.. స్వరూప

బెంగళూరు(క్రీడలు), న్యూస్‌టుడే: ఎవరైనా కుడి లేదా ఎడమ చేత్తో రాస్తారు. రెండు చేతులతోనూ ఏకకాలంలో రాసే సాధనతో ఓ మెరుపు మెరుస్తోంది కర్ణాటకలోని మంగళూరుకు చెందిన 17 ఏళ్ల బాలిక ఆదిస్వరూప. ఏకకాలంలో రెండూ చేతులతో నల్లబల్లపై రాస్తూ తన నైపుణ్యం చాటుకుంటోంది. ఒకే నిమిషంలో కన్నడ, ఆంగ్ల భాషలను రెండూ చేతుల సాయంతో 45 పదాలను రాసి లతా ఫౌండేషన్‌కు చెందిన ప్రపంచ రికార్డుతో పాటు ‘ఇండియా బుక్‌ ఆఫ్‌ రికార్డు’లో స్థానాన్ని పొందింది. ఆమె మెదడు రెండు చేతులతో ఒకే సమయంలో పనులు చేయడానికి సహకరిస్తున్నట్లు నిపుణులు వివరించారు. ఇలాంటి అద్భుతమైన సాధనను చేసేవారు పది లక్షల మందిలో ఒకరు ఉంటారని వెల్లడించారు.