Pratap singh Rane: కాంగ్రెస్‌ నేతకు జీవితకాల కేబినెట్‌ హోదా ప్రకటించిన భాజపా

పనాజీ: కాంగ్రెస్​ సీనియర్ నేత, గోవా మాజీ ముఖ్యమంత్రి ప్రతాప్ ​సింగ్​ రాణే(87)కు జీవితకాలం కేబినెట్​ హోదా ఇస్తున్నట్లు ఆ రాష్ట్ర ప్రభుత్వం ప్రకటించింది. ఈ విషయాన్ని ప్రస్తుత ముఖ్యమంత్రి ప్రమోద్​ సావంత్​ గురువారం వెల్లడించారు. రాష్ట్రానికి ప్రతాప్ ​సింగ్​ అందించిన సేవలకు గుర్తింపుగా ఈ హోదా ఇస్తున్నట్లు వెల్లడించారు. నాలుగుసార్లు గోవాకు ముఖ్యమంత్రిగా పనిచేసిన రాణే.. ప్రస్తుతం పోరియం అసెంబ్లీకి ఎమ్మెల్యేగా ఉన్నారు.

కేబినెట్‌ హోదా ప్రకటించిన నేపథ్యంలో ప్రమోద్​ సావంత్​ మీడియాతో మాట్లాడుతూ.. ‘గోవా రాష్ట్రానికి విశేష సేవలందించిన ప్రతాప్​ సింగ్​ రాణేకు జీవితకాలం కేబినెట్​ హోదా ఇవ్వాలని ప్రభుత్వం నిర్ణయించింది. గత 50 ఏళ్లుగా రాజకీయాల్లో ఉంటూ.. ముఖ్యమంత్రిగా, స్పీకర్​గా ప్రతాప్​ సింగ్​ సేవలు అందించారు. ప్రజలకు ఆదర్శంగా నిలుస్తున్నారు’ అని సీఎం పేర్కొన్నారు. ఈ విషయాన్ని ట్విటర్‌ వేదికగానూ వెల్లడించారు. ఎమ్మెల్యేగా 50 ఏళ్లు పూర్తి చేసుకున్న మాజీ ముఖ్యమంత్రులు, మాజీ స్పీకర్లకు అలాంటి హోదా ఇవ్వాలని రాష్ట్ర మంత్రివర్గం తీర్మానించిందని ప్రమోద్‌ సావంత్‌ తెలిపారు.

ప్రభుత్వ ప్రకటనపై ప్రతాప్ ​సింగ్​ రాణే కుమారుడు, ఆ రాష్ట్ర ఆరోగ్యశాఖ మంత్రి (భాజపా) విశ్వజిత్​ రాణే హర్షం వ్యక్తం చేశారు. 50 ఏళ్ల పాటు ప్రజాసేవ చేసిన ఓ వ్యక్తిని ఇంతకంటే ఘనంగా గౌరవించలేమని పేర్కొన్నారు. సీఎంకు ధన్యవాదాలు తెలుపుతూ ట్వీట్​ చేశారు. ముఖ్యమంత్రి సహా రాష్ట్ర కేబినెట్‌కు ధన్యవాదాలు తెలిపారు.