India Corona: నిన్నటి కంటే 24 శాతం అధికంగా కరోనా కేసులు..!

దిల్లీ: దేశంలో కరోనా వ్యాప్తి అదుపులో ఉంది. స్వల్ప హెచ్చుతగ్గులతో కొత్త కేసులు నమోదవుతున్నాయి. బుధవారం 4.52 లక్షల మందికి వైద్య పరీక్షలు నిర్వహించగా.. 2,628 మందికి వైరస్‌ పాజిటివ్‌గా తేలింది. ముందురోజు కంటే 24 శాతం మేర అధికంగా కేసులొచ్చాయి. నిన్న 2,167 మంది కోలుకున్నారు. కొత్త కేసుల పెరుగుదలతో క్రియాశీల కేసులు 15,414కు ఎగబాకాయి. ప్రస్తుతం క్రియాశీల రేటు 0.04 శాతానికి చేరగా.. రికవరీ రేటు 98.75 శాతంగా ఉంది. 24 గంటల వ్యవధిలో 18 మంది మరణించగా.. ఇప్పటివరకూ 5.24 లక్షల మంది మహమ్మారికి బలయ్యారు. ఈ వైరస్ కట్టడికి కేంద్రం ప్రారంభించిన టీకా కార్యక్రమం కింద 192 కోట్లకు పైగా డోసులు పంపిణీ అయ్యాయి. నిన్న 13.13 లక్షల మంది టీకా వేయించుకున్నారని గురువారం కేంద్రం వెల్లడించింది.