Flu: ‘ఫ్లూ’ భయం భయం.. అక్కడ పాఠశాలల మూసివేత

పుదుచ్చేరి: కేంద్ర పాలిత ప్రాంతం పుదుచ్చేరిని జ్వరాలు పట్టిపీడిస్తున్నాయి. ముఖ్యంగా చిన్నారులు ఈ ఫ్లూ బారిన పడుతున్నారు. ప్రతిరోజు 150 మంది పిల్లలు జ్వరాలతో ఆసుపత్రుల్లో చేరుతున్నట్లు అధికారులు పేర్కొన్నారు. ఫ్లూ భయంతో శనివారం 1 నుంచి 8వ తరగతి విద్యార్థులకు సెలవులు ప్రకటించిన స్థానిక ప్రభుత్వం.. తాజాగా ఎల్‌కేజీ, యూకేజీ చిన్నారుల తరగతులను కూడా నిలిపివేస్తున్నట్లు వెల్లడించింది. సెలవులు ప్రకటించాలని ఆరోగ్య శాఖ సిఫార్సు చేయగా.. విద్యాశాఖ డైరెక్టరేట్ ఈ నిర్ణయం తీసుకుంది. కాగా ఈ నిర్ణయానికి ముఖ్యమంత్రి ఎన్.రంగసామి, విద్యాశాఖ ఇన్‌ఛార్జ్‌ హోంమంత్రి ఏ.నమశ్శివాయం ఆమోదం తెలిపారు. సెప్టెంబర్ 25వరకు ఈ సెలవులు కొనసాగనున్నాయి.

కాగా ఈ జ్వరాలపై హెల్త్‌ డైరెక్టర్‌ మాట్లాడారు. ‘గత వారం రోజుల నుంచి జ్వరాలతో ఆసుపత్రుల్లో చేరే చిన్నారుల సంఖ్య పెరిగిపోయింది. పుదుచ్చేరి, కరైకల్‌తోపాటు పలు ప్రాంతాల్లోని దవాఖానాల్లో ప్రతిరోజు 150కి పైగా మంది చేరుతున్నారు’ అని తెలిపారు. ఈ నేపథ్యంలోనే అన్ని పీహెచ్‌సీలు, ప్రధాన ఆసుపత్రుల్లో ఫ్లూ క్లినిక్‌లను ఏర్పాటు చేసినట్లు వెల్లడించారు.