Avalanche: కశ్మీర్‌లో విషాదం.. మంచు చరియలు విరిగిపడి ముగ్గురు జవాన్లు మృతి!

శ్రీనగర్‌: మంచు కొండల్లో విషాదం! జమ్మూ- కశ్మీర్‌ కుప్వారా జిల్లాలోని మచిల్ సెక్టార్‌లో నియంత్రణ రేఖ వద్ద శుక్రవారం మంచు చరియలు(Avalanche) విరిగిపడిన ఘటనలో ముగ్గురు జవాన్లు మృతి చెందారు. 56 రాష్ట్రీయ రైఫిల్స్‌ చెందిన జవాన్ల బృందం ఎప్పటిలాగే శుక్రవారం పెట్రోలింగ్‌కు వెళ్లింది. ఈ క్రమంలోనే మంచు చరియలు విరిగి, వారిపై పడ్డాయి. హిమపాతంలో చిక్కుకుపోయిన ఇద్దరు సైనికులను రక్షించి, కుప్వారాలోని మిలిటరీ ఆస్పత్రికి తరలించారు. ఈ క్రమంలో పెట్రోలింగ్‌లో ఉన్న మరో సైనికుడు హైపోథర్మియా(శరీర ఉష్ణోగ్రత పడిపోవడం)కు గురయ్యాడు. దీంతో అతడిని సైతం ఆసుపత్రికి తీసుకొచ్చారు. అయితే, ఈ ముగ్గురూ ప్రాణాలు కోల్పోయారని రక్షణశాఖ శ్రీనగర్‌ పౌర సంబంధాల అధికారి వెల్లడించారు. మృతులకు సంబంధించిన వివరాలు తెలియరాలేదు. ఇదిలా ఉండగా.. అక్టోబర్‌లోనూ ఉత్తరాఖండ్‌లో సంభవించిన హిమపాతం కారణంగా 27 మంది పర్వతారోహకులు ప్రాణాలు కోల్పోయిన విషయం తెలిసిందే.