తల్లి కాబోతున్న అనిత..!

నెట్టింట్లో చక్కర్లు కొడుతోన్న వీడియో

ముంబయి: నటి అనిత శుభవార్త చెప్పారు. తాను తల్లి కాబోతున్నట్లు వెల్లడించారు. పారిశ్రామికవేత్త రోహిత్‌తో ప్రేమలో ఉన్న ఆమె 2013లో ఆయనతో ఏడడుగులు వేశారు. అయితే అనిత తల్లికాబోతుందని ఇప్పటికే పలుమార్లు వార్తలు వచ్చినప్పటికీ ఆమె వాటిన్నింటినీ కొట్టిపారేశారు. ఈ నేపథ్యంలో తాజాగా ఆమె ఈ శుభవార్తను సోషల్‌మీడియా వేదికగా అభిమానులతో పంచుకున్నారు.

తన భర్త రోహిత్‌తో కలిసి ఓ ప్రత్యేక వీడియోను రూపొందించి నెట్టింట్లో పోస్ట్‌ చేశారు. రోహిత్‌-అనిత పరిచయం.. ప్రపోజ్‌ చేసుకోవడం.. పెళ్లి.. ఇలా ప్రతి విషయాన్ని ఈ వీడియోలో ఆకట్టుకునే విధంగా చూపించారు. సదరు వీడియో చూసిన నెటిజన్లు.. అనిత దంపతులకు శుభాకాంక్షలు తెలుపుతున్నారు. దీంతో ప్రస్తుతం ఈ వీడియో నెట్టింట్లో తెగ చక్కర్లు కొడుతోంది.

ఐశ్వర్యరాయ్‌, అనిల్‌‌ కపూర్‌, అక్షయ్‌ ఖన్నా ప్రధాన పాత్రల్లో తెరకెక్కిన ‘తాళ్‌’ చిత్రంతో అనిత వెండితెరకు పరిచయమయ్యారు. అనంతరం ఆమె తెలుగులో తెరకెక్కిన ‘నువ్వు- నేను’ సినిమాలో నటించి మంచి విజయాన్ని సొంతం చేసుకున్నారు. ఆ సినిమా తర్వాత ఆమె పలు తెలుగు, తమిళ చిత్రాల్లో నటించి పేరు తెచ్చుకున్నారు. వెండితెరపైనే కాకుండా ధారావాహికలతో బుల్లితెర ప్రేక్షకులను కూడా ఆమె అలరిస్తున్నారు.