My Name Is Shruthi: శ్రుతి పోరాటం

‘చర్మం ఒలిచి బిజినెస్‌ చేస్తామంటున్నారు. ఏం చేయాలి వాళ్లని?’ అంటూ ఆవేదనగా ప్రశ్నిస్తోంది ఓ యువతి. మానవ అవయవాలతో వ్యాపారం చేస్తున్న మాఫియాపై ఆమె ఎలా పోరాటం చేసిందో తెలియాలంటే ‘మై నేమ్‌ ఈజ్‌ శ్రుతి’ చూడాల్సిందే. హన్సిక ప్రధాన పాత్రధారిగా రూపొందుతున్న చిత్రమిది. వైష్ణవి ఆర్ట్స్‌ పతాకంపై బురుగు రమ్య ప్రభాకర్‌ తెలుగు, తమిళం, హిందీ భాషల్లో ఏకకాలంలో నిర్మిస్తున్నారు. శ్రీనివాస్‌ ఓంకార్‌ దర్శకుడు. ఇటీవల ఈ సినిమా హిందీ, తమిళ టీజర్లని విడుదల చేశారు. ఈ సందర్భంగా నిర్మాత మాట్లాడుతూ  ‘‘వైవిధ్యమైన కాన్సెప్ట్‌తో రూపొందుతున్న చిత్రమిది. ప్రేక్షకుల్ని ఆలోచింపజేసే అంశాలు ఉంటాయి. త్వరలోనే విడుదల తేదీని ప్రకటిస్తాం’’ అన్నారు. మురళీశర్మ, జేపీ, ఆడుకలం నారాయణ్‌, ప్రవీణ్‌, సీవీఎల్‌ తదితరులు నటిస్తున్న ఈ చిత్రానికి సంగీతం: మార్క్‌ రాబిన్‌.