Tiger NageswaraRao: ‘టైగర్‌..’లో మరో నాయిక

రవితేజ కథానాయకుడిగా వంశీ తెరకెక్కిస్తున్న పాన్‌ ఇండియా చిత్రం ‘టైగర్‌ నాగేశ్వరరావు’. అభిషేక్‌ అగర్వాల్‌ నిర్మాత. ఈ సినిమాతో కృతి సనన్‌ సోదరి నూపుర్‌ సనన్‌ కథానాయికగా వెండితెరకు పరిచయమవుతున్న సంగతి తెలిసిందే. ఇప్పుడీ చిత్రంతోనే మరో కొత్త నాయిక చిత్రసీమకు పరిచయం కానుంది. ఆమే ప్రముఖ మోడల్‌, నటి గాయత్రీ భరద్వాజ్‌. ఈ సినిమాలో ఆమె మరో కథానాయికగా సందడి చేయనుంది. ఈ విషయాన్ని శుక్రవారం అధికారికంగా ప్రకటించారు. ‘‘ఎంతో పేరుమోసిన స్టూవర్టుపురం నాగేశ్వరరావు జీవితాధారంగా తెరకెక్కుతున్న చిత్రమిది. ఇద్దరు కథానాయికలకు మంచి ప్రాధాన్యం ఉంది.’’ అని చిత్రబృందం ప్రకటించింది. ఈ సినిమా శనివారం పూజా కార్యక్రమాలతో ప్రారంభం కానుంది. ఈ వేడుకకు చిరంజీవి ముఖ్య అతిథిగా విచ్చేయనున్నారు. ఈ సందర్భంగా మధ్యాహ్నం 12.06 గంటలకు ప్రీలుక్‌ను విడుదల చేయనున్నారు. సంగీతం: జీవి ప్రకాష్‌, మాటలు: శ్రీకాంత్‌ విస్సా, ఛాయాగ్రహణం: ఆర్‌ మదీ.