RRR: నీ నిష్కలంక చరితం... నా సుప్రభాతమవని..

దర్శక ధీరుడు రాజమౌళి రూపొందిస్తున్న ప్రతిష్టాత్మక చిత్రం ‘ఆర్‌ఆర్‌ఆర్‌’. ఎన్టీఆర్‌, రామ్‌చరణ్‌ కథానాయకులు. అజయ్‌దేవగణ్‌, శ్రియ ముఖ్యపాత్రలు పోషిస్తున్నారు. అలియా భట్‌, ఒలివియా మోరీస్‌ నాయికలు. ఈ చిత్రం జనవరి 7న  ప్రేక్షకుల ముందుకు రానుంది. ఈ నేపథ్యంలో శుక్రవారం ‘జనని..’ అనే పాటను చిత్రబృందం విడుదల చేసింది. ‘థీమ్‌ ఆఫ్‌ ఆర్‌ఆర్‌ఆర్‌’ పేరుతో విడుదలైన ఈ పాట తీవ్రమైన భావోద్వేగాలతో నిండిపోయింది. ఇందులోని ప్రతీ దృశ్యం ఆకట్టుకుంటోంది. ‘‘నేనంటే పోరాటం... అందులో సగం నువ్వు’’ అంటూ అజయ్‌దేవగణ్‌ వీరోచితంగా పలికే డైలాగ్‌ హైలెట్‌గా నిలిచింది. ‘‘జనని.. ప్రియభారతి జనని.. నీ నిష్కలంక చరితం... నా  సుప్రభాతమవని... జనని’’ అంటూ సాగే సాహిత్యం ప్రేక్షకుల్లో దేశభక్తిని రేకేత్తించేలా ఉంది. ఈపాటకు ఎం.ఎం.కీరవాణి సంగీతంతో పాటు... సాహిత్యమూ అందించి ఆలపించారు. ఇందులో రామ్‌చరణ్‌ అల్లూరి సీతారామరాజుగా, ఎన్టీఆర్‌ కొమురం భీమ్‌గా కనిపిస్తున్నారు. ఈ చిత్రానికి డీవీవీ దానయ్య నిర్మాత.