‘రావణాసుర’.. ట్రైలర్‌ ఆరోజే

‘రావణాసుర’గా ప్రేక్షకుల్ని థ్రిల్‌ చేసేందుకు సిద్ధమయ్యారు రవితేజ. ఆయన హీరోగా నటించిన ఈ సినిమాని సుధీర్‌వర్మ తెరకెక్కించారు. అభిషేక్‌ పిక్చర్స్‌, ఆర్‌.టి.టీమ్‌ వర్క్స్‌ సంస్థలు సంయుక్తంగా నిర్మించాయి. హీరో సుశాంత్‌ ఓ కీలక పాత్ర పోషించారు. ఏప్రిల్‌ 7న థియేటర్లలోకి రానుంది. ఈ నేపథ్యంలోనే ప్రచార కార్యక్రమాల జోరు పెంచింది చిత్ర బృందం. ఇందులో భాగంగా ఈనెల 28న ట్రైలర్‌ విడుదల చేయనున్నారు. ఈ విషయాన్ని శనివారం అధికారికంగా ప్రకటించారు. ఈ మేరకు ఓ కొత్త పోస్టర్‌ను అభిమానులతో పంచుకున్నారు. అందులో రవితేజ తుపాకీ పట్టుకొని చేతులు పైకెత్తి సీరియస్‌ లుక్‌లో కనిపించగా.. బ్యాక్‌గ్రౌండ్‌లో కోర్టు గది తగలబడే సన్నివేశం ఆసక్తి రేకెత్తిస్తోంది. స్టైలిష్‌ యాక్షన్‌ థ్రిల్లర్‌ కథతో తెరకెక్కుతున్న ఈ సినిమాలో రవితేజ న్యాయవాదిగా కనిపించనున్నారు. అను ఇమ్మాన్యుయేల్‌, మేఘా ఆకాష్‌, ఫరియా అబ్దుల్లా, దక్షా నగార్కర్‌, పూజిత పొన్నాడ కథానాయికలు.