ప్రభాస్‌ జోరు

ప్రభాస్‌ - మారుతి కలయికలో ఓ చిత్రం రూపొందుతోన్న సంగతి తెలిసిందే. పీపుల్‌ మీడియా ఫ్యాక్టరీ సంస్థ నిర్మిస్తోంది. ఇప్పటికే చిత్రీకరణ ప్రారంభించుకున్న ఈ సినిమా.. ఇప్పుడు మరో కొత్త షెడ్యూల్‌కు సిద్ధమవుతోంది. ఈనెల రెండో వారం నుంచి హైదరాబాద్‌లో ఈ షెడ్యూల్‌ మొదలు కానుందని సమాచారం. దాదాపు పదిరోజులకు పైగా సాగనున్న ఈ షెడ్యూల్‌లో ప్రభాస్‌తో పాటు ఇతర ముఖ్య తారాగణంపై కీలక సన్నివేశాలు తెరకెక్కించనున్నారు. వినోదాత్మకంగా సాగే హారర్‌ థ్రిల్లర్‌గా ఈ చిత్రం ఉండనున్నట్లు ప్రచారం వినిపిస్తోంది. ఇందులో నిధి అగర్వాల్‌, మాళవిక మోహన్‌, రిద్ది కుమార్‌ నాయికలుగా నటిస్తున్నట్లు సమాచారం.

జేమ్స్‌ బాండ్‌ లోకేషన్లలో ‘సలార్‌’

ప్రశాంత్‌ నీల్‌ దర్శకత్వంలో ప్రభాస్‌ నటిస్తోన్న చిత్రం ‘సలార్‌’. ఈ సినిమాలోని కొన్ని కీలక సన్నివేశాలను ఇటలీలో తెరకెక్కించడానికి సన్నాహాలు చేస్తున్నట్లు తెలుస్తోంది. జేమ్స్‌ బాండ్‌ చిత్రం ‘నో టైమ్‌ టు డై’ షూటింగ్‌ జరిగిన ప్రదేశాల్లో సలార్‌ చిత్రీకరణ కోసం ఏర్పాట్లు చేస్తున్నారట.