Naveen Polishety: రాజు గాడి పెళ్లి.. ఈ దశాబ్దానికే ప్రత్యేకం

‘‘రాజు గాడి పెళ్లి ఇది.. ఏడు తరాల పెళ్లి.. చాలా ఎంటర్‌టైనింగ్‌గా ఉంటుంది’’ అంటూ హంగామా చేస్తున్నాడు నవీన్‌ పొలిశెట్టి. మరి ఆ పెళ్లి వేడుక ఎలా జరిగింది.. ఆ వేడుకలో నవ్వులు ఏస్థాయిలో పండాయి? తెలియాలంటే ‘అనగనగా ఒక రాజు’’ చూడాల్సిందే. ‘జాతిరత్నాలు’ విజయం తర్వాత నవీన్‌ పొలిశెట్టి నటిస్తున్న చిత్రమిది. కల్యాణ్‌ శంకర్‌ తెరకెక్కిస్తున్నారు. సితార ఎంటర్‌టైన్‌మెంట్స్‌, ఫార్చ్యూన్‌ 4 సినిమాస్‌ సంస్థలు సంయుక్తంగా నిర్మిస్తున్నాయి. సంక్రాంతి సందర్భంగా ఆదివారం ఈ చిత్ర టైటిల్‌తో పాటు ఓ వీడియో గ్లింప్స్‌ను విడుదల చేశారు. ‘‘ఇదేం విడ్డూరం ఆడవాళ్లకేనా వడ్డాణం.. అందుకే నేను కూడా మామకు చెప్పి డబ్ల్యుడబ్ల్యుయఫ్‌ లాంటిది ఓ ఐదు కిలోల బంగారం చేయించాను’’, ‘‘మన పెళ్లి ఫొటోలు చూసి ఆ కత్రినా కైఫ్‌, విక్కీ కౌషల్‌ కుళ్లుకుని చావాలరా.. అలా తియ్యి నువ్వు’’ అంటూ వీడియోలో నవీన్‌ చేసిన హంగామా ఆసక్తికరంగా అనిపించింది. ‘‘రాజు గాడి పెళ్లి ఇది. నేను చెప్పుకోకూడదు కానీ, ఈ దశాబ్దంలోనే మోస్ట్‌ ఎంటర్‌టైన్‌మెంట్‌ వేడుక ఇదే. థియేటర్లలో మీరే చూస్తారుగా’’ అంటూ టీజర్‌ ఆఖర్లో నవీన్‌ చెప్పిన డైలాగ్‌ సినిమాపై అంచనాలు పెంచేలా చేస్తోంది.