నితిన్‌కు అభయమిచ్చిన హైదరాబాద్‌ పోలీస్‌

ఇంటర్నెట్‌ డెస్క్‌: నితిన్‌కు హైదరాబాద్‌ పోలీసులు అభయం ఇవ్వడం ఏమిటీ..? ఇంతకీ నితిన్‌కు ఏమైంది అనుకుంటున్నారా..? కంగారు పడకండి. నితిన్‌కు ఏమీ కాలేదు. ప్రస్తుతం నితిన్‌, కీర్తి సురేశ్‌ జంటగా ‘రంగ్‌ దే!’ తెరకెక్కుతున్న విషయం తెలిసిందే. వెంకీ అట్లూరి దర్శకత్వంలో తెరకెక్కుతున్న ఈ సినిమా మార్చి 26న విడుదల కానుంది. ఈ సందర్భంగా నితిన్‌ ఒక ట్వీట్‌ చేశారు. ‘కనబడుట లేదు.. డియర్‌ అను.. నువ్వు ఎక్కడున్నా రంగ్‌దే ప్రమోషన్స్‌లో పాల్గొనాలని మా కోరిక. ఇట్లు నీ అర్జున్‌’ అంటూ ఆ ట్వీట్‌లో కీర్తి సురేశ్‌ చిన్ననాటి ఫొటోను పంచుకున్నారు. కాగా.. ఆ ట్వీట్‌కు హైదరాబాద్‌ సిటీ పోలీస్‌లు స్పందించారు. ‘చింతించకండి నితిన్‌. మేము జాగ్రత్త తీసుకుంటాం’ అంటూ బదులిచ్చారు. దీనిపై నవ్వుతున్న ఎమోజీలతో మళ్లీ నితిన్‌ స్పందించారు. పోలీసుల చమత్కారానికి నెటిజన్లు సైతం ఫిదా అవుతున్నారు.