thandel: వేగంగా తండేల్‌ ప్రయాణం

ఈసారి గురి తప్పేదేలేదంటూ ‘తండేల్‌’ ప్రపంచాన్ని ఓ ప్రచార చిత్రంతో ఆవిష్కరించాయి సినీ వర్గాలు. నాగచైతన్య కథానాయకుడిగా తెరకెక్కుతున్న ఈ సినిమా చిత్రీకరణ వేగంగా సాగుతోంది. సముద్రం నేపథ్యంలో కీలక సన్నివేశాల్ని తెరకెక్కిస్తున్నారు. కర్ణాటక,  గోవా తదితర ప్రాంతాల్లో ఇటీవల కొన్ని పోరాట ఘట్టాల్ని, టాకీ భాగాన్ని చిత్రీకరించారు. నెల రోజులకిపైగా సాగిన ఈ షెడ్యూల్‌లో నాగచైతన్య, సాయిపల్లవితోపాటు, ఇతర తారాగణం పాల్గొన్నట్టు సినీ వర్గాలు తెలిపాయి. వాస్తవ సంఘటనల ఆధారంగా... భారత్‌, పాకిస్థాన్‌ నేపథ్యంలో సాగే ప్రేమకథతో ఈ చిత్రాన్ని చందూ మొండేటి తెరకెక్కిస్తున్నారు. నాగచైతన్య ఇందులో విభిన్నమైన గెటప్‌లో కనిపించనున్నారు. గీతా ఆర్ట్స్‌ పతాకంపై బన్నీ వాస్‌ నిర్మిస్తున్నారు. అల్లు అరవింద్‌ సమర్పకులు. దేవిశ్రీప్రసాద్‌ స్వరాలు సమకూరుస్తున్నారు. శ్యామ్‌దత్‌ ఛాయాగ్రాహకుడు.