Nayanthara: నయన్‌ ‘గాడ్‌’

నయనతార, జయం రవి ప్రధాన పాత్రల్లో అహ్మద్‌ తెరకెక్కించిన తమిళ చిత్రం ‘ఇరైవన్‌’. సుధన్‌ సుందరం, జి.జయరామ్‌ సంయుక్తంగా నిర్మించారు. ఈ సినిమా తెలుగులో ‘గాడ్‌’ పేరుతో విడుదల కానుంది. ఈ విషయాన్ని చిత్ర నిర్మాణ సంస్థ అధికారికంగా ప్రకటించింది. ఈ మేరకు ఓ కొత్త పోస్టర్‌ను సామాజిక మాధ్యమాల్లో పంచుకుంది. అందులో నయన్‌, జయం రవి సీరియస్‌ లుక్స్‌లో ఆసక్తికరంగా కనిపించారు. ‘‘విభిన్నమైన సైకలాజికల్‌ యాక్షన్‌ థ్రిల్లర్‌ కథాంశంతో రూపొందిన చిత్రమిది. ఆద్యంతం ఉత్కంఠతభరితంగా సాగుతుంది’’ అని చిత్రవర్గాలు తెలిపాయి. ఈ సినిమాని ఈనెల 28న విడుదల చేయనున్నట్లు చిత్ర బృందం ఇప్పటికే ప్రకటించింది. తెలుగులోనూ ఇదే తేదీకి విడుదల చేస్తారా? లేదా? అన్నది తేలాల్సి ఉంది. సంగీతం: యువన్‌ శంకర్‌ రాజా, ఛాయాగ్రహణం: హరి కె.వేదాంతం.