Nithin: భీష్మ తర్వాత మళ్లీ!

నితిన్‌ (Nithin), రష్మిక (Rashmika) జంటగా వెంకీ కుడుముల దర్శకత్వంలో ఓ సినిమా పట్టాలెక్కింది. ‘భీష్మ’ లాంటి హిట్‌ తర్వాత ఈ ముగ్గురి కలయిక నుంచి వస్తున్న రెండో చిత్రమిది. మైత్రీ మూవీ మేకర్స్‌ సంస్థ నిర్మిస్తోంది. రాజేంద్ర ప్రసాద్‌, వెన్నెల కిషోర్‌ కీలక పాత్రలు పోషిస్తున్నారు. ఈ సినిమా హైదరాబాద్‌లో శుక్రవారం పూజా కార్యక్రమాలతో ప్రారంభమైంది. ముహూర్తపు సన్నివేశానికి చిరంజీవి క్లాప్‌ కొట్టగా.. బాబీ కెమెరా స్విచ్చాన్‌ చేశారు. గోపీచంద్‌ మలినేని గౌరవ దర్శకత్వం వహించారు. హను రాఘవపూడి, బుచ్చిబాబు స్క్రిప్ట్‌ అందించారు. వినోదాత్మకంగా సాగే అడ్వెంచరస్‌ చిత్రమిది. ఈ సినిమాకి సంగీతం: జి.వి.ప్రకాష్‌ కుమార్‌, కూర్పు: ప్రవీణ్‌ పూడి, ఛాయాగ్రహణం: సాయి శ్రీరామ్‌.

‘రేవ్‌ పార్టీ’లో ఏం జరిగింది?

క్రిష్‌ సిద్దిపల్లి హీరోగా రాజు బొనగాని తెరకెక్కిస్తున్న పాన్‌ ఇండియా చిత్రం ‘రేవ్‌ పార్టీ’. బొనగాని ఎంటర్‌టైన్‌మెంట్స్‌ పతాకంపై నిర్మిస్తున్నారు. ఈ సినిమా పూజా కార్యక్రమాలతో లాంఛనంగా ప్రారంభమైంది. ముహూర్తపు సన్నివేశానికి అభిషేక్‌ నామా క్లాప్‌ కొట్టగా.. వంశీ, శశికిరణ్‌ తిక్కా, లక్ష్మణ్‌ సంయుక్తంగా స్క్రిప్ట్‌ అందించారు. ఈ సందర్భంగా దర్శకుడు రాజు మాట్లాడుతూ.. ‘‘రేవ్‌ పార్టీలలో యువత ఎలా ప్రవర్తిస్తుంటారు.. ఇలాంటి పార్టీల వల్ల వాళ్ల జీవితంలో ఎలాంటి మలుపులు వస్తాయి అనే అంశాల్ని ఈ చిత్రంలో చర్చించాం. వచ్చే నెల 3నుంచి రెగ్యులర్‌ చిత్రీకరణ ప్రారంభిస్తాం. ఒకే షెడ్యూల్‌లో సినిమా పూర్తి చేసేందుకు ప్రణాళిక రచించాం’’ అన్నారు. ఈ చిత్రానికి సంగీతం: దిలీప్‌ బండారి, ఛాయాగ్రహణం: వెంకట్‌ మన్నం.