‘ఆ సినిమాలోకి నన్నెందుకు తీసుకోలేదు’: ‘ఛత్రపతి’ నటి అసహనం

ముంబయి: ‘డ్రీమ్‌గర్ల్‌’ (Dream Girl) తో నటిగా గుర్తింపు తెచ్చుకున్నారు బాలీవుడ్‌ బ్యూటీ నుష్రత్‌ బరుచా (Nushrratt Bharuccha). ఇటీవల ‘ఛత్రపతి’ (హిందీ వెర్షన్‌)లో నటించిన ఆమె త్వరలో ‘అకేలీ’తో ప్రేక్షకుల ముందుకు రానున్నారు. ఈ నేపథ్యంలోనే తాజాగా ఓ ఇంటర్వ్యూలో పాల్గొన్నారు. ‘డ్రీమ్‌గర్ల్‌’కు సీక్వెల్‌గా రానున్న ‘డ్రీమ్‌గర్ల్‌-2’ (Dream Girl2)లో తాను భాగం కాకపోవడంపై మాట్లాడారు.

‘‘డ్రీమ్‌గర్ల్‌’లో నేను కథానాయికగా నటించా. ఆ చిత్రబృందం అంటే నాకెంతో ఇష్టం. వాళ్లతో కలిసి వర్క్‌ చేయడాన్ని ఎంతగానో మిస్‌ అవుతున్నా. ‘డ్రీమ్‌గర్ల్‌ -2’లో నాకెందుకు ఛాన్స్‌ ఇవ్వలేదో తెలియదు. ఈ ప్రశ్నకు చిత్రబృందం మాత్రమే సమాధానం చెప్పగలదు. నాకు అవకాశం ఇవ్వనందుకు ఎంతో బాధపడుతున్నా. విషయం ఏదైనా సరే తమకు నచ్చిన నిర్ణయాన్ని తీసుకునే హక్కు ప్రతి ఒక్కరికీ ఉంటుంది. అలాగే, నాక్కూడా ఈ విషయం గురించి బాధపడే హక్కు ఉంది. ఆ బాధ చెప్పే స్వేచ్ఛ కూడా ఉంది’’ అని ఆమె తెలిపారు.

కోలీవుడ్‌ స్టార్‌ డైరెక్టర్స్‌ను కలిసిన రామ్‌చరణ్‌.. కారణమేమిటంటే?

ఆయుష్మాన్‌ ఖురానా (Ayushmann Khurrana) హీరోగా తెరకెక్కిన చిత్రం ‘డ్రీమ్‌గర్ల్‌’. 2019లో విడుదలైన ఈ చిత్రం బాక్సాఫీస్‌ వద్ద మంచి విజయాన్ని సొంతం చేసుకుంది. ఇప్పుడు ఇదే చిత్రానికి సీక్వెల్‌గా ‘డ్రీమ్‌గర్ల్‌-2’ సిద్ధమైంది. అనన్యాపాండే కథానాయిక. రాజ్‌ శాండిల్యా దర్శకుడు. ఆగస్టు 25న ఇది ప్రేక్షకుల ముందుకు రానుంది. ఇదే రోజున నుష్రత్‌ నటించిన ‘అకేలీ’ కూడా విడుదల కానుంది.