Ram Charan: రామ్‌చరణ్‌- బుచ్చిబాబు మూవీ ఆ బయోపిక్‌ కాదట..!

హైదరాబాద్‌: రామ్‌ చరణ్‌ (Ram Charan) ప్రస్తుతం ‘గేమ్‌ ఛేంజర్‌’ (Game Changer) చిత్రంలో నటిస్తున్నారు. దీని తర్వాత ఆయన బుచ్చిబాబుతో కలసి వర్క్‌ చేయనున్న విషయం తెలిసిందే. ఇప్పటికే ఈ చిత్రంపై పలు ఊహాగానాలు వినిపిస్తున్నాయి. తాజాగా మరో వార్త తెరపైకి వచ్చింది. ఉత్తరాంధ్ర ప్రాంతానికి చెందిన మల్లయోధుడు కోడి రామ్మూర్తి జీవితం ఆధారంగా దీనిని రూపొందిస్తున్నారన్న వార్త ప్రస్తుతం సోషల్‌ మీడియాలో వైరల్‌ అవుతోంది.

‘ఇవన్నీ అవాస్తవాలు... ఈ సినిమా బయోపిక్‌ కాదు. పల్లెటూరు నేపథ్యంలో స్పోర్ట్స్‌ డ్రామా’ అని సన్నిహిత వర్గాలు తెలిపాయంటూ ఓ మీడియా సంస్థ వెల్లడించింది. అయితే వేసవిలో ఈ సినిమా చిత్రీకరణ ప్రారంభమయ్యే అవకాశాలున్నాయి. ఇందులో ఓ కీలక పాత్రలో కన్నడ స్టార్‌ శివరాజ్‌కుమార్‌ నటించనున్నారు. ఏఆర్‌ రెహమాన్‌ సంగీతం అందించనున్నారు. 

గేమ్‌ ఛేంజర్‌ (Game Changer) విషయానికొస్తే... శంకర్‌ దర్శకత్వంలో ఈ చిత్రం తెరకెక్కుతోంది. రామ్‌ చరణ్‌ ద్విపాత్రాభినయం చేస్తున్నట్లు టాక్‌. పొలిటికల్‌ యాక్షన్‌ ఎంటర్‌టైనర్‌గా రూపొందుతున్న ఈ చిత్రం పాన్‌ ఇండియా స్థాయిలో విడుదల కానుంది. కియారా అడ్వాణీ కథానాయిక. శ్రీకాంత్‌, అంజలి, ఎస్‌.జే. సూర్య, సునీల్‌... తదితరులు కీలకపాత్రలు పోషిస్తున్నారు.