RRR: రెండు విడుదల తేదీలు

కరోనా మూడో దశ ప్రభావంతో ఇటీవల మరోమారు వాయిదా పడిన ‘ఆర్‌.ఆర్‌.ఆర్‌’... కొత్తగా రెండు విడుదల తేదీల్ని ఖరారు చేసింది. అన్నీ అనుకూలమైతే మార్చి 18న విడుదలకి సిద్ధమనీ, లేదంటే ఏప్రిల్‌ 28న చిత్రాన్ని ప్రేక్షకుల ముందుకు తీసుకొస్తామని సామాజిక మాధ్యమాల ద్వారా ప్రకటించాయి ‘ఆర్‌.ఆర్‌.ఆర్‌’ సినీ వర్గాలు. ఎస్‌.ఎస్‌.రాజమౌళి దర్శకత్వంలో ఎన్టీఆర్‌, రామ్‌చరణ్‌ కథానాయకులుగా నటించిన చిత్రమిది. రూ.400 కోట్లకిపైగా వ్యయంతో రూపొందిన ఈ సినిమా కోసం అంతర్జాతీయ స్థాయిలో ప్రేక్షకులు ఎదురు చూస్తున్నారు. ఈ చిత్రం కరోనాతో ఇప్పటికే పలుమార్లు వాయిదా పడిన సంగతి తెలిసిందే. తాజాగా విడుదల తేదీపై ఓ స్పష్టతనిచ్చింది చిత్రబృందం. దేశంలో మహమ్మారి పరిస్థితులు మెరుగుపడి, అన్ని థియేటర్లు పూర్తి సామర్థ్యంతో పునః ప్రారంభమైతే మార్చి 18న విడుదల చేయడానికి తాము సిద్ధమని ప్రకటించింది. లేదంటే ఏప్రిల్‌ 28న విడుదల చేస్తామని పేర్కొన్నారు.