Shahid Kapoor: కరీనాతో ముద్దు ఫొటోలు లీక్‌.. 18 ఏళ్ల తర్వాత స్పందించిన షాహిద్‌

ముంబయి: బాలీవుడ్‌ నటి కరీనా కపూర్‌ (Kareena Kapoor) నటుడు షాహిద్‌ కపూర్‌ (Shahid Kapoor) కొన్నేళ్ల క్రితం రిలేషన్‌లో ఉన్న విషయం తెలిసిందే. అనుకోని కారణాలతో వీరిద్దరూ విడిపోయారు. అయితే, వీరిద్దరూ ప్రేమలో ఉన్నప్పుడు ఈ జంటకు సంబంధించిన కొన్ని ఫొటోలు నెట్టింట లీక్‌ అయ్యాయి. అందులో షాహిద్‌ - కరీనా ముద్దు పెట్టుకుంటూ కనిపించారు. కాగా, తన వ్యక్తిగత జీవితానికి సంబంధించిన ఫొటోలు లీక్‌ కావడంపై సుమారు 18 ఏళ్ల తర్వాత షాహిద్‌ తొలిసారి మాట్లాడారు.

‘‘ఆ సంఘటన జరిగిన సమయంలో నా వయసు 24 ఏళ్లు. ముద్దు ఫొటోలు బయటకు రావడంతో ఎంతో బాధపడ్డా. నా జీవితం నాశనం అయ్యిందనిపించింది. నా వ్యక్తిగత గోప్యతకు భంగం కలిగింది. ప్రైవసీని కాపాడుకోవడానికి ఇక ఏం చేయలేననిపించింది. గందరగోళానికి గురయ్యా. అసలు ఏం జరుగుతుందో కూడా అర్థం కాలేదు. ఆ పరిస్థితులు నన్నెంతో బాధించాయి. తెలిసీ తెలియని వయసులో ఒక అమ్మాయితో రిలేషన్‌లో ఉండటం.. ఆ వెంటనే ఇలాంటివి చోటుచేసుకోవడంతో ఎంతో బాధపడ్డా. ఇక, ఇప్పుడు నాకు పెళ్లి అయ్యి పిల్లలు ఉన్నారు. కాబట్టి, నా పర్సనల్‌ లైఫ్‌పై ఎవరికీ అంత ఆసక్తి ఉండదు’’ అని తాజాగా ఇచ్చిన ఓ ఇంటర్వ్యూలో షాహిద్‌ తెలిపారు.

• ఇదీ చదవండి: ‘ఏజెంట్‌’కు ఏం కష్టాలు వచ్చాయ్‌ రా బాబూ.. ఇప్పట్లో ఓటీటీలో రానట్లేనా?

అనంతరం ఆయన ‘కబీర్‌సింగ్‌’ (అర్జున్‌రెడ్డి రీమేక్‌)కు వచ్చిన వ్యతిరేకతపై మాట్లాడుతూ.. ‘‘కబీర్‌ సింగ్‌’ విడుదలైనప్పుడు.. మా చిత్రాన్ని ప్రేక్షకులు ఇష్టపడటాన్ని కొంతమంది అంగీకరించలేకపోయారు. ప్రేక్షకులే ఇష్టపడుతున్న సమయంలో మమ్మల్ని ప్రశ్నించడానికి మీరెవరు? నా ఉద్దేశం ఏమిటంటే.. ప్రేమలో ప్రతి ఒక్కరికీ సెకండ్‌ ఛాన్స్‌ ఉండాలి.  ఇది కేవలం ఒక సింపుల్‌ అమ్మాయి, టాలెంట్‌, కోపం కలిగిన అబ్బాయిల ప్రేమకథ మాత్రమే’’ అని పేర్కొన్నారు.