18 Pages: మొబైల్‌ ఫోన్‌.. పుస్తకంతో ప్రేమలో పడితే

నిఖిల్‌, అనుపమ పరమేశ్వరన్‌ జంటగా పల్నాటి సూర్య ప్రతాప్‌ తెరకెక్కిస్తున్న చిత్రం ‘18 పేజీస్‌’. బన్నీ వాసు నిర్మాత. అల్లు అరవింద్‌   సమర్పిస్తున్నారు. ఈ సినిమాని వచ్చే ఏడాది ఫిబ్రవరి 18న థియేటర్లలో విడుదల చేయనున్నట్లు దర్శక నిర్మాతలు ప్రకటించారు. ఈ మేరకు ఆదివారం   సామాజిక మాధ్యమాల్లో ఓ కొత్త పోస్టర్‌ను అభిమానులతో పంచుకున్నారు. ‘‘ఒకవేళ ఓ ఫోన్‌.. పుస్తకంతో ప్రేమలో పడితే ఎలా ఉంటుందో చూడాలనుకుంటున్నారా? అయితే, 18న సిద్ధంగా ఉండండి’’ అంటూ ఆ పోస్టర్‌కు ఓ వ్యాఖ్యను జత చేశారు. ‘‘కొత్తదనం నిండిన ప్రేమకథతో రూపొందుతోన్న చిత్రమిది. నిఖిల్‌, అనుపమల కెమిస్ట్రీ అందరినీ ఆకట్టుకుంటుంది. ఇద్దరూ మునుపెన్నడూ చూడని విధంగా విభిన్నమైన పాత్రల్లో కనిపిస్తారు. ప్రస్తుతం తుది దశ చిత్రీకరణలో ఉంది’’ అని చిత్ర బృందం తెలియజేసింది. సంగీతం: గోపీసుందర్‌, కూర్పు: నవీన్‌ నూలి, ఛాయాగ్రహణం: ఎ.వాసంత్‌.