Varudu Kavalenu Movie: అనంతశ్రీరామ్‌పై పోలీసులకు ఫిర్యాదు

నెల్లూరు: ప్రముఖ సినీ పాటల రచయిత అనంత్‌ శ్రీరామ్‌ తీవ్ర విమర్శలు ఎదుర్కొంటున్నారు. ఇటీవల ‘వరుడు కావలెను’ సినిమా కోసం ఆయన ‘దిగు దిగు దిగు నాగ’ పాట రాశారు. అయితే ఈ పాట అశ్లీలంగా మహిళలను కించపరుస్తూ.. నాగదేవత, సుబ్రహ్మణ్యం స్వామి తదితర దేవతామూర్తులను ప్రస్తావిస్తూ ఉందంటూ పలువురు మండిపడుతున్నారు. ఆ పాటను తొలగించాలంటూ భాజపా మహిళా మోర్చా తిరుపతి లోక్‌సభ నియోజకవర్గ అధ్యక్షురాలు బిందురెడ్డి చిల్లకూరు పోలీస్‌స్టేషన్‌లో ఫిర్యాదు చేశారు. పాటతో హిందూ మనోభావాలను దెబ్బతీసిన చిత్రబృందంపై క్రిమినల్‌ కేసులు నమోదు చేయాలని ఆమె కోరారు. ఈ మేరకు శనివారం రాత్రి పాటల రచయిత అనంతశ్రీరామ్‌, మ్యూజిక్‌ డైరెక్టర్‌ తమన్‌, ఇతర చిత్ర యూనిట్‌ సభ్యులు మరో అయిదుగురిపై కేసు నమోదు చేయాలని కోరుతూ చిల్లకూరు ఎస్సై సుధాకర్‌రెడ్డికి లిఖితపూర్వక ఫిర్యాదు అందించారు. ఈ విషయంపై చిల్లకూరు ఎస్సై సుధాకర్‌రెడ్డిని ‘న్యూస్‌టుడే’ వివరణ కోరగా భాజపా నాయకురాలు బిందురెడ్డి ‘వరుడు కావలెను’ చిత్రయూనిట్‌పై ఫిర్యాదు చేశారని, దీనిపై న్యాయ సలహా తీసుకొని చర్యలు తీసుకుంటామన్నారు.