Vaishnav Tej: వైష్ణవ్‌ వస్తున్నాడు..

వైష్ణవ్‌ తేజ్‌ (Vaishnav Tej), శ్రీలీల (Sreeleela) జంటగా శ్రీకాంత్‌ ఎన్‌.రెడ్డి దర్శకత్వంలో ఓ చిత్రం రూపొందుతోంది. సితార ఎంటర్‌టైన్‌మెంట్స్‌, ఫార్చ్యూన్‌ ఫోర్‌ సినిమాస్‌ సంస్థలు సంయుక్తంగా నిర్మిస్తున్నాయి. ఈ సినిమా ఏప్రిల్‌ 29న ప్రేక్షకుల ముందుకు రానుంది. ఈ విషయాన్ని చిత్ర బృందం సోమవారం అధికారికంగా ప్రకటించింది. ఈ మేరకు విడుదల తేదీతో కూడిన ఓ కొత్త పోస్టర్‌ను సామాజిక మాధ్యమాల్లో పంచుకున్నారు. అందులో తీగల కంచె అవతల అస్పష్టంగా కనిపిస్తూ వైష్ణవ్‌ నిల్చున్న తీరు.. మరోవైపు కంచె తగలబడుతున్న వైనం ఆసక్తిరేకెత్తించేలా ఉన్నాయి. ‘‘పూర్తి స్థాయి మాస్‌ యాక్షన్‌ చిత్రమిది. ఇందులో వైష్ణవ్‌ తేజ్‌ సరికొత్త మాస్‌ లుక్‌తో కనిపించనున్నారు. ప్రస్తుతం శరవేగంగా చిత్రీకరణ జరుపుకుంటోంది. మరిన్ని వివరాలు త్వరలో వెల్లడించనున్నాం’’ అని చిత్ర వర్గాలు తెలిపాయి. ఈ సినిమాకి కూర్పు: నవీన్‌ నూలి, ఛాయాగ్రహణం: డుడ్లే.