బిహార్‌లో ప్రచారానికి ‘సేనా’ సైన్యం

ముంబయి: బిహార్‌ అసెంబ్లీ ఎన్నికలలో ప్రచారాన్ని హోరెత్తించడానికి శివసేన సిద్ధం అవుతోంది. ఆ పార్టీ అధ్యక్షుడు, మహారాష్ట్ర ముఖ్యమంత్రి ఉద్ధవ్‌ ఠాక్రే స్వయంగా తమ అభ్యర్థుల తరపున ప్రచారం చేయనున్నారు. ఈ ఎన్నికల ప్రచారంలో తమ పార్టీ తరపున ప్రచారం చేయనున్న 22 మంది నేతల పేర్లతో కూడిన జాబితాను శివసేన గురువారం విడుదల చేసింది. ఉద్ధవ్‌ ఠాక్రేతో పాటు ఆయన కుమారుడు, మహారాష్ట్ర పర్యాటక శాఖ మంత్రి ఆదిత్య ఠాక్రే సైతం ప్రచారంలో పాల్గొననున్నారు. సుభాష్‌ దేశాయ్‌, సంజయ్‌రౌత్‌, అనిల్‌ దేశాయ్‌, వినాయక్‌ రౌత్‌, అరవింద్‌ సావంత్‌, పియాంక చతుర్వేది, రాహుల్‌ షెవాలే, కృపాల్‌ తుమనేలూ ప్రచార కర్తల జాబితాలో ఉన్నారు. గత ఏడాది భాజపాతో విడిపోయిన సేన, బిహార్‌లో దాదాపు 50 స్థానాలలో పోటీ చేయనున్నట్లు విశ్వసనీయ వర్గాల సమాచారం. బిహార్‌లో మొత్తం 243 అసెంబ్లీ నియోజకవర్గాలకు ఎన్నికలు జరగనున్నాయి. ఈ ఎన్నికలు మూడు దశలలో నిర్వహించనున్నారు. మొదటి దశ అక్టోబరు 28న, రెండోదశ నవంబరు 3న, ఇక చివరిదైన మూడోదశ నవంబరు 7న ఎన్నికలు జరగనున్నాయి. నవంబరు 10న ఓట్ల లెక్కింపు ఉంటుంది.