Kamal Haasan : కులం నా ‘ప్రధాన రాజకీయ ప్రత్యర్థి’ : కమల్‌ హాసన్‌

చెన్నై : కులం తనకు ‘ప్రధాన రాజకీయ ప్రత్యర్థి’ అని ప్రముఖ నటుడు(Actor), మక్కల్‌ నీది మయ్యం పార్టీ అధ్యక్షుడు కమల్‌ హాసన్‌(Kamal Haasan) వ్యాఖ్యానించారు. దర్శకుడు పా రంజిత్‌ నెలకొల్పిన ‘నీలం బుక్స్‌’ ప్రారంభ కార్యక్రమంలో ఆయన పాల్గొన్నారు. ఈ సందర్భంగా కమల్‌ మాట్లాడుతూ ‘నాకు అతి పెద్ద ప్రత్యర్థి, నా రాజకీయ ప్రత్యర్థి కులం. 21 ఏళ్ల యువకుడిగా ఉన్నప్పటి నుంచి నేను ఈ విషయం చెబుతున్నా. ఇప్పుడు కూడా అదే మాట అంటున్నా. ఈ విషయంలో నా అభిప్రాయం ఎప్పటికీ మారదు’ అంటూ కమల్ పేర్కొన్నారు. 

అంతే కాకుండా ఆయన దేవుడి(God) గురించి కూడా తన అభిప్రాయాన్ని వ్యక్తపరిచారు. ‘చక్రం కనిపెట్టిన తరువాత మానవుడు చేసిన గొప్ప సృష్టి దేవుడు. అలాంటి దైవం పేరుతో కొందరు మనపై దాడి చేస్తుంటే దాన్ని ఎంత మాత్రం అంగీకరించకూడదని’ తెలిపారు. అనంతరం దర్శకుడు పా రంజిత్‌(Pa.Ranjith) మాట్లాడుతూ కమల్‌హాసన్‌ కళాత్మక చిత్రాలను రూపొందించే ఫార్ములాను తయారు చేశారని ప్రశంసించారు. దాంతో ఇప్పటికీ అలాంటి చిత్రాలను అన్ని వర్గాల ప్రేక్షకులు ప్రజలు ఆదరిస్తున్నారని చెప్పారు. రాజకీయంగా ప్రజలను చైతన్యవంతులను చేసేందుకు ‘నీలం బుక్స్‌’ను ఒక వేదికగా ఎంచుకున్నానని వివరించారు.