Telangana News: మెయినాబాద్‌ ఘటనపై ఎమ్మెల్యేలతో సమావేశమైన సీఎం కేసీఆర్‌

హైదరాబాద్‌: తెలంగాణ రాజకీయాల్లో ఒక్కసారిగా కలకలం చెలరేగింది. మునుగోడు ఉప ఎన్నిక వేళ తెరాసకు చెందిన నలుగురు ఎమ్మెల్యేలను కొనుగోలు చేసేందుకు దిల్లీకి చెందిన వ్యక్తులు యత్నించారన్న ఆరోపణలు తీవ్ర చర్చనీయాంశం అయ్యాయి. దీంతో ఈ ఘటనపై తెరాస నాయకత్వం దృష్టిసారించింది.  ఎమ్మెల్యేలు రేగా కాంతారావు, గువ్వల బాలరాజు, బీరం హర్షవర్ధన్‌రెడ్డి, పైలెట్‌ రోహిత్‌రెడ్డి ప్రగతిభవన్‌కు చేరుకున్నారు. వీరితో సీఎం కేసీఆర్‌, మంత్రులు కేటీఆర్‌, హరీశ్‌రావు సమావేశమయ్యారు. ఈ సందర్భంగా ప్రగతిభవన్‌ వద్ద పోలీసులు భారీగా మోహరించారు. 

ఈ ఘటన పట్ల మంత్రి ఇంద్రకరణ్‌రెడ్డి మాట్లాడుతూ.. ‘‘ప్రజాస్వామ్యాన్ని భాజపా అపహస్యం చేస్తోంది. సిగ్గుఎగ్గు లేకుండా ఎమ్మెల్యేలను కొనేందుకు యత్నించింది. తెరాసను దెబ్బకొట్టాలనే దురాలోచనతో అడ్డదార్లు ఎంచుకుంది. తెరాస ఎమ్మెల్యేలు అమ్ముడుపోయే రకం కాదు. ధనబలంతో ఇతర రాష్ట్రాల్లో ప్రభుత్వాలను కూల్చారు. కేసీఆర్‌ ముందు మోదీ, అమిత్‌ షా ఆటలు సాగవు. తెరాస ప్రభుత్వాన్ని కూల్చడం ఎవరితరం కాదు’’ అని మంత్రిఅన్నారు. 

అధికార తెరాసకు చెందిన ఎమ్మెల్యేలు గువ్వల బాలరాజు, బీరం హర్షవర్ధన్‌రెడ్డి, రేగ కాంతారావు, పైలెట్‌ రోహిత్‌రెడ్డిలను పార్టీ ఫిరాయింపులకు ప్రోత్సహించేందుకు దిల్లీకి చెందిన వ్యక్తులు వచ్చారన్న పక్కా సమాచారంతో పోలీసులు ప్రత్యేక ఆపరేషన్‌ నిర్వహించారు. నగరశివారులోని మొయినాబాద్‌లో గల ఓ ఫాంహౌజ్‌లో పోలీసులు వీరిని రెడ్‌ హ్యాండెడ్‌గా పట్టుకున్నారు.