ECI: ఆ 5 రాష్ట్రాల్లో ర్యాలీలపై నిషేధం కొనసాగించాలా? వద్దా?

కేంద్ర ఎన్నికల సంఘం సమాలోచనలు

దిల్లీ: దేశ వ్యాప్తంగా కొవిడ్‌ ఉద్ధృతిని కట్టడి చేసే లక్ష్యంతో ఎన్నికలు జరగనున్న ఐదు రాష్ట్రాల్లో బహిరంగ సభలు, ర్యాలీలపై ఈసీ విధించిన నిషేధం నేటితో ముగియనుంది. ఈ నేపథ్యంలో భౌతిక ర్యాలీలు, రోడ్‌షోలపై నిషేధాన్ని మళ్లీ పొడిగించాలా? లేదా అనే అంశంపై చర్చించేందుకు కేంద్ర ఎన్నికల సంఘం అధికారులు వర్చువల్‌ సమావేశాలు నిర్వహించి సమాలోచనలు చేస్తున్నారు. మరోవైపు, ఉత్తర్‌ప్రదేశ్‌, ఉత్తరాఖండ్‌, గోవా, పంజాబ్‌, మణిపూర్‌ అసెంబ్లీ ఎన్నికలకు జనవరి 8న షెడ్యూల్‌ ప్రకటించిన విషయం తెలిసిందే. అదే సమయంలో ఒమిక్రాన్‌ ప్రభావం నేపథ్యంలో భౌతిక ర్యాలీలు, రోడ్‌షోలు, బైక్‌ ర్యాలీలు వంటి ప్రచార కార్యక్రమాలపై జనవరి 15వరకు నిషేధం ప్రకటించారు. ఆ తర్వాత కేసులు అదుపులోకి రాకపోగా మరింతగా పెరుగుతుండటంతో ఆ నిషేధాన్ని జనవరి 22 వరకు పొడిగిస్తూ నిర్ణయం తీసుకుంది. అదేసమయంలో, రాజకీయ పార్టీలు 300 మందికి మించకుండా/50శాతం ఆక్యుపెన్సీతో ఇండోర్‌ సమావేశాలు నిర్వహించుకొవచ్చంటూ వెసులుబాటు కల్పించింది. అయితే, ఇటీవల పొడిగించిన నిషేధాజ్ఞలు నేటితో ముగియనున్నందున కేంద్ర ఎన్నికల సంఘం అధికారులు కేంద్ర ఆరోగ్యశాఖ, వైద్యరంగ నిపుణులు, ఎన్నికలు జరగబోయే ఐదు రాష్ట్రాల ఎన్నికల అధికారులతో చర్చించి ఓ నిర్ణయం తీసుకొనే అవకాశం ఉన్నట్టు సమాచారం.