AP Politics: కైకలూరులో రచ్చకెక్కిన ఫ్లెక్సీల వివాదం.. జాతీయ రహదారిపై భైఠాయించిన జనసేన కార్యకర్తలు

ఏలూరు: కైకలూరులో ఫ్లెక్సీల వివాదం రచ్చకెక్కింది. వైకాపా ఏర్పాటు చేసిన ఫ్లెక్సీలకు ప్రతిగా జనసేన నాయకుడు ఫ్లెక్సీ ఏర్పాటు చేయడంతో వివాదం రాజుకుంది. తెదేపా అధినేత చంద్రబాబు పల్లకిని పవన్‌ మోస్తున్నట్లు కైకలూరులో వైకాపా ఫ్లెక్సీలు ఏర్పాటు చేసింది. దీనిపై అభ్యంతరం వ్యక్తం చేస్తూ.. వైకాపా ఫ్లెక్సీలకు పోటీగా జనసేన ఫ్లెక్సీ ఏర్పాటుకు నిర్ణయించింది. రాక్షస పాలనకు అంతం.. ప్రజా పాలనకు ఆరంభం పేరుతో జనసేన నాయకుడు బీబీ రావు ఫ్లెక్సీ ఏర్పాటు చేస్తుండగా పోలీసులు అడ్డుకున్నారు. దీంతో వైకాపా ఫ్లెక్సీ తొలగించకుండా జనసేన ఫ్లెక్సీ తీయడంపై ఆయన అభ్యంతరం వ్యక్తం చేశారు. దీంతో పోలీసులు, బీవీ రావు మధ్య వాగ్వాదం చోటుచేసుకుంది. ఈ ఘటనతో జనసేన నాయకులు జాతీయ రహదారిపై భైఠాయించారు. ఈ చర్యతో బీవీ రావుతో పాటు జనసేన కార్యకర్తలను పోలీసులు అదుపులోకి తీసుకున్నారు. అనంతరం సొంత పూచీకత్తుపై వారిని విడిచిపెట్టారు.