జన సమీకరణకు వైకాపా వల

రూ.500, మద్యం సీసా, బిర్యానీ ఇస్తామంటూ ప్రలోభాలు

ఈనాడు, ఏలూరు: పశ్చిమగోదావరి జిల్లా భీమవరంలో మంగళవారం సీఎం పర్యటన నేపథ్యంలో మద్యం పారించయినా, డబ్బులు వెదజల్లయినా జనాలను తరలించేందుకు వైకాపా విశ్వప్రయత్నాలు చేస్తోంది. రెండు లక్షల మందిని రప్పించి బలప్రదర్శన చేయాలని ప్రయత్నిస్తోంది. సమావేశానికి వచ్చేవారి పేర్లను సోమవారం ఉదయం నుంచి ఉమ్మడి జిల్లాలోని వైకాపా నాయకులు, గృహసారథులు, కన్వీనర్లు నమోదు చేసుకుంటున్నారు. బస్సెక్కగానే రూ.500, మద్యం సీసా ఇస్తామని, రెండు పూటలా బిర్యానీ పెడతామంటూ ప్రలోభాలకు గురి చేస్తున్నారు. రాజీనామా చేసిన వాలంటీర్లు జన సమీకరణ కోసం ఇంటింటికీ వెళ్లి ప్రజలను సభకు రావాలని పిలుస్తున్నారు.

నియమావళి ఉంటే మాకేంటి?: బస్సు యాత్ర సోమవారం రాత్రి ఏలూరు జిల్లా ఉంగుటూరు మండలం నారాయణపురం చేరుకోనుంది. జగన్‌ రాత్రికి అక్కడే బస చేయనున్నారు. ఎన్నికల నియమావళిని ఉల్లంఘిస్తూ ఈ ప్రాంతానికి సమీపంలో ‘మేమంతా సిద్ధం’ పేరుతో భారీ ఫ్లెక్సీలను పెట్టారు. భీమవరం సభకు ఉమ్మడి పశ్చిమతోపాటు, కృష్ణా, గుంటూరు, తూర్పుగోదావరి జిల్లాలనుంచి 1200 బస్సులు కేటాయించారు. ఆయా జిల్లాల్లో సామాన్య బస్సు ప్రయాణికులు ఇక్కట్లు తప్పేలా లేవు.