Sita Soren: జేఎంఎంకు షాక్‌..! భాజపాలోకి శిబూ సోరెన్‌ పెద్ద కోడలు

రాంచీ: లోక్‌సభ ఎన్నికల (Lok Sabha Elections) వేళ ఝార్ఖండ్‌ రాజకీయాల్లో కీలక పరిణామం చోటుచేసుకుంది. ఝార్ఖండ్‌ ముక్తి మోర్చా (JMM) అధినేత శిబూ సోరెన్‌ పెద్ద కోడలు, మాజీ సీఎం హేమంత్‌ సోరెన్‌ వదిన సీతా సోరెన్‌ (Sita Soren) భాజపాలో చేరారు. భాజపా (BJP) జాతీయ ప్రధాన కార్యదర్శి వినోద్‌ తావ్డే, పార్టీ రాష్ట్ర ఎన్నికల ఇన్‌ఛార్జి లక్ష్మీకాంత్‌ బాజ్‌పాయ్‌ సమక్షంలో కాషాయ కండువా కప్పుకొన్నారు. అంతకు కొన్ని గంటల ముందు ఆమె జేఎంఎంకు రాజీనామా చేశారు. పార్టీలో తనను నిర్లక్ష్యం చేస్తున్నారని, ఏకాకిని చేశారని ఆరోపించారు.

సోరెన్‌ కుటుంబంలో ‘ఇంటిపోరు’.. కల్పనకు ‘సీత’ చెక్‌!

మనీలాండరింగ్‌ కేసులో అరెస్టైన హేమంత్‌ స్థానంలో ఆయన సతీమణి కల్పనాకు సీఎం పగ్గాలు అప్పగించే అవకాశాలున్నాయంటూ ఇటీవల ప్రచారం జరిగిన విషయం తెలిసిందే. అయితే.. ఆమెను ముఖ్యమంత్రి చేసేందుకు తాను వ్యతిరేకం అంటూ సీతా సోరెన్‌ బహిరంగ ప్రకటన చేయడం అప్పట్లో చర్చనీయాంశమైంది. ఇదిలా ఉండగా.. మూడోసారి ఎమ్మెల్యేగా ఉన్న సీతా సోరెన్‌ రాకతో రాష్ట్రంలోని ఎస్టీ ఓటర్లను ఆకట్టుకునేందుకు భాజపా చేస్తోన్న ప్రయత్నాలకు పెద్ద ఊతం లభించినట్లయ్యింది. ఈ వర్గం ఓటర్లు జేఎంఎంకు ప్రధాన ఓటు బ్యాంకుగా ఉన్నారు.