Kishan Reddy: ఎన్నికల కోసమే సీఎం కేసీఆర్‌ కొత్త పథకాలు: కిషన్‌ రెడ్డి

ఖమ్మం: ఎన్నికల కోసమే సీఎం కేసీఆర్‌ కొత్త పథకాలు ప్రకటిస్తున్నారని తెలంగాణ భాజపా అధ్యక్షుడు, కేంద్ర మంత్రి కిషన్‌ రెడ్డి విమర్శించారు. ఖమ్మం జిల్లాలో ఇవాళ ఆయన పర్యటించారు. తెలంగాణ ఉద్యమంలో ఖమ్మం ప్రజల పోరాటం మరవలేనిదని కొనియాడారు. రాష్ట్రంలో కాంగ్రెస్‌, భారాస పాలన చూశారని.. ఈసారి భాజపాకు అవకాశం ఇవ్వాలని ప్రజలను కోరారు. కమ్యూనిస్టులది అవకాశవాద రాజకీయాలని వ్యాఖ్యానించారు. ‘‘రైతు రుణమాఫీ అమలులో రాష్ట్ర ప్రభుత్వం జాప్యం చేసింది. సకాలంలో రుణాలు మాఫీ కాకపోవడంతో రైతులు డిఫాల్టర్లుగా మారారు. వరదలతో రైతులు నష్టపోయినా.. పరిహారం ఇవ్వలేదు. దళితబంధును.. భారాస నాయకుల బంధుగా మార్చారు. మద్యం టెండర్ల ద్వారా వచ్చిన డబ్బుతో ఓట్లు కొనేందుకు ప్రయత్నిస్తున్నారు’’ అని కిషన్‌ రెడ్డి ఆరోపించారు.