CPI-CPM: సీట్ల విషయం త్వరగా తేల్చాలి.. KCR అపాయింట్‌మెంట్‌ కోరిన వామపక్ష నేతలు

హైదరాబాద్‌: భారాస అధినేత, సీఎం కేసీఆర్‌తో వామపక్షాల నేతలు చర్చలు జరపాలని నిర్ణయించారు. ఈనెల 21న ముగ్దూం భవన్‌లో సీపీఐ, సీపీఎం కార్యదర్శులు, ముఖ్యనేతలు సమావేశమై భారాసతో చర్చలు జరపాలని ఏకాభిప్రాయానికి వచ్చారు. ఇందుకుగాను ఆ పార్టీ నేతలు సీఎం అపాయింట్‌మెంట్‌ కోరారు. ఒకట్రెండు రోజుల్లో అపాయింట్‌మెంట్‌ ఖరారు చేస్తామని సీఎంవో సమాచారమిచ్చింది. అపాయింట్‌మెంట్‌ ఖరారు కాగానే ముఖ్యమంత్రి కేసీఆర్‌తో సీపీఐ, సీపీఎం రాష్ట్ర కార్యదర్శులు కూనంనేని సాంబశివరావు, తమ్మినేని వీరభద్రం ఇతర నేతలు భేటీ కానున్నారు. ఎన్నికల్లో ఈ పార్టీలకు కేటాయించే సీట్ల విషయంలో స్పష్టత ఇవ్వాలని భారాసపై వామపక్ష పార్టీలు ఒత్తిడి తెస్తున్నాయి. ఎన్నికలు సమీపిస్తుండటంతో సీట్ల విషయం త్వరగా తేల్చాలని, ఆలస్యం చేస్తే మొదటికే మోసం వస్తుందనే భావనలో వామపక్ష నేతలు ఉన్నారు.