Purandeswari: తితిదే ఛైర్మన్‌ పదవి రాజకీయ పునరావాసానికి కావొద్దు: పురందేశ్వరి

అమరావతి: తితిదే ఛైర్మన్‌ అన్నది రాజకీయ పునరావాస పదవి కాకూడదని భాజపా రాష్ట్ర అధ్యక్షురాలు దగ్గుబాటి పురందేశ్వరి అన్నారు. హిందూ ధర్మంపై నమ్మకం ఉన్నవాళ్లే ఆ పదవికి న్యాయం చేయగలరని పేర్కొన్నారు. ఈ మేరకు ఆమె ట్వీట్‌ చేశారు. 

‘‘ఇంతకుముందు వైకాపా ప్రభుత్వం 80 మంది సభ్యులతో ధర్మకర్తల మండలి నియామకం చేపట్టింది. దానిపై గళం విప్పిన తర్వాత 52 మంది నియామకం నిలిపివేశారు. ప్రభుత్వం ఈ నియామకాలను రాజకీయ పునరావాసంగానే పరిగణిస్తోందని అర్థమవుతోంది. తితిదే ఛైర్మన్‌ పదవికి హిందూ ధర్మంపై నమ్మకం ఉన్నవారిని.. ఆ ధర్మాన్ని అనుసరించేవారినే నియమించాలి’’ అని పురందేశ్వరి ట్వీట్‌ చేశారు.

ఇటీవల తితిదే నూతన ఛైర్మన్‌గా వైకాపా ఎమ్మెల్యే భూమన కరుణాకర్‌రెడ్డిని రాష్ట్ర ప్రభుత్వం నియమించింది. ఈ నేపథ్యంలో పురందేశ్వరి ట్వీట్‌ చేయడం ప్రాధాన్యం సంతరించుకుంది.