AP News: ముందస్తు ఎన్నికలకు వెళ్లే ఆలోచన లేదు: మిథున్‌రెడ్డి

తిరుపతి: ముందస్తు ఎన్నికలకు వెళ్లే ఆలోచన ప్రభుత్వానికి లేదని వైకాపా ఎంపీ మిథున్‌రెడ్డి స్పష్టం చేశారు. ముందస్తు ఎన్నికలకు తాము సిద్ధంగా ఉన్నామని తెదేపా అధినేత చంద్రబాబు నిన్న వెల్లడించిన నేపథ్యంలో ఆయన స్పందించారు. ఐదేళ్లూ తాము అధికారంలో ఉంటామన్నారు. పార్టీని కాపాడుకునేందుకే చంద్రబాబు ముందస్తు ఎన్నికల గురించి మాట్లాడుతున్నారని మిథున్‌రెడ్డి వ్యాఖ్యానించారు. తిరుపతిలోని ఓ హోటల్‌ నూతనంగా తయారు చేసిన మొబైల్‌ యాప్‌ను ప్రారంభించిన ఆయన ఈ విధంగా మాట్లాడారు. తెదేపా కేంద్ర కార్యాలయంలో విలేకరులతో చంద్రబాబు నిన్న ఇష్టాగోష్ఠిగా మాట్లాడారు. ఈ సందర్భంగా ప్రభుత్వం ముందస్తు ఎన్నికలకు వెళుతుందని ప్రచారం జరుగుతోంది కదా, మీరు సిద్ధమేనా అన్న ప్రశ్నకు తాము సిద్ధంగా ఉన్నామని చంద్రబాబు జవాబిచ్చిన విషయం తెలిసిందే.