Afghanistan: ప్రపంచకప్‌లో మా నెక్ట్స్‌ టార్గెట్‌ అదే: అఫ్గానిస్థాన్‌ కోచ్

ఇంటర్నెట్ డెస్క్: వన్డే ప్రపంచకప్‌లో మేటి జట్లకు అఫ్గానిస్థాన్‌ (Afghanistan) గట్టి షాక్‌లు ఇస్తోంది. ఇప్పటికే ఇంగ్లాండ్, పాకిస్థాన్‌లను ఓడించిన ఆ జట్టు తాజాగా శ్రీలంకను బెంబేలెత్తించింది. తొలుత శ్రీలంకను 241 పరుగులకే కట్టడి చేసిన అఫ్గానిస్థాన్‌.. ఈ లక్ష్యాన్ని మూడే వికెట్లు కోల్పోయి 45.2 ఓవర్లలోనే ఛేదించింది. ఈ విజయంతో పాయింట్ల పట్టికలో ఐదో స్థానానికి దూసుకొచ్చి సెమీస్ రేసులో నిలిచింది. మిగిలిన మూడు మ్యాచ్‌ల్లో అఫ్గాన్‌ విజయం సాధిస్తే టాప్‌-4లో నిలిచే అవకాశముంది. ఇదిలా ఉండగా.. ప్రపంచకప్‌లో తమ తదుపరి లక్ష్యమేంటో అఫ్గాన్‌ హెడ్‌కోచ్ జోనాథన్ ట్రాట్ (Jonathan Trott) వెల్లడించాడు. అఫ్గాన్ జట్టులోని కొంతమంది ఆటగాళ్లు భారీ ఇన్నింగ్స్‌లు ఆడుతున్నా వాటిని సెంచరీలుగా మల్చలేకపోతున్నారని పేర్కొన్నాడు. మిగిలిన మూడు మ్యాచ్‌ల్లో అఫ్గాన్‌ బ్యాటర్ల దృష్టి శతకం చేయడంపైనే ఉంటుందని జోనాథన్‌ ట్రాట్ తెలిపాడు.

‘‘టోర్నమెంట్‌లో ఇప్పటివరకు చాలామంది సెంచరీలు చేశారు. కానీ, మా జట్టు తరఫున ఎవరూ శతకం సాధించలేదు. కాబట్టి.. మా నెక్ట్స్ టార్గెట్ అదే. ఎవరో ఒకరు ఈ బాధ్యత తీసుకుని ఆడతారు. ఎక్కువ సమయం క్రీజులో గడుపుతారు. మా ఆటగాళ్లు సెంచరీ చేస్తారనే నమ్మకం నాకుంది. భవిష్యత్‌లో వీరు సెంచరీలు చేయగలరనడంలో నాకు ఎటువంటి సందేహం లేదు. తదుపరి మ్యాచ్‌ నుంచే ఇది ప్రారంభమవుందని ఆశిస్తున్నా’’ అని హెడ్‌కోచ్ జోనాథన్ వివరించాడు. ప్రపంచకప్‌లో  రెహ్మనుల్లా గుర్బాజ్‌, ఇబ్రహీం జాద్రాన్‌, రహమత్‌ షా సెంచరీలకు చేరువైనా ఆ ఫీట్‌ని సాధించలేకపోయారు.