జకో.. కష్టంగా

ప్రిక్వార్టర్స్‌లో అడుగు
పెగులా, రుబ్లెవ్‌ ఔట్‌
ఫ్రెంచ్‌ ఓపెన్‌

పారిస్‌

23వ గ్రాండ్‌స్లామ్‌ టైటిల్‌పై కన్నేసిన టెన్నిస్‌ దిగ్గజం జకోవిచ్‌ (సెర్బియా) ఫ్రెంచ్‌ ఓపెన్‌లో కష్టంగా ప్రిక్వార్టర్స్‌లో అడుగుపెట్టాడు. శుక్రవారం పురుషుల సింగిల్స్‌ మూడో రౌండ్లో ఈ మూడో సీడ్‌ ఆటగాడు 7-6 (7-4), 7-6 (7-5), 6-2 తేడాతో 29వ సీడ్‌ డేవిడోవిచ్‌ ఫొకినా (స్పెయిన్‌)పై పోరాడి గెలిచాడు. తొలి సెట్‌ ఆరంభం నుంచే ఇద్దరు క్రీడాకారులు నువ్వానేనా అన్నట్లు తలపడ్డారు. అయిదో గేమ్‌లో జకో సర్వీస్‌ను బ్రేక్‌ చేసి ఫొకినా 3-2తో ఆధిక్యం సాధిస్తే.. తర్వాతి గేమ్‌లోనే సర్వీస్‌ బ్రేక్‌ చేసి మళ్లీ 3-3తో జకో స్కోరు సమం చేశాడు. 5-6తో వెనుకబడ్డ దశలోనూ ప్రత్యర్థి సర్వీస్‌ను బ్రేక్‌ చేసి జకో 6-6తో పోరును టైబ్రేకర్‌కు మళ్లించాడు. అందులో విన్నర్లతో సత్తాచాటి పైచేయి సాధించాడు. ఒకరు ఆధిక్యంలోకి వెళ్లడం.. వెంటనే మరొకరు స్కోరు సమం చేయడం.. రెండో సెట్‌ ఇలాగే సాగింది. అందులోనూ టైబ్రేకర్‌లో జకోదే గెలుపు. మూడో సెట్లో జకో జూలు విదిల్చాడు. 3-0తో ఆధిక్యం సాధించిన అతను.. అదే ఊపులో మ్యాచ్‌ ముగించాడు. ఈ పోరులో జకో 3 ఏస్‌లు, 34 విన్నర్లు కొట్టాడు. మరోవైపు ఏడో సీడ్‌ రుబ్లెవ్‌ (రష్యా) 7-5, 6-0, 3-6, 6-7 (5-7), 3-6తో సొనెగో (ఇటలీ) చేతిలో పోరాడి ఓడాడు. తొలి రెండు సెట్లు గెలిచి.. విజయం వైపు దూసుకెళ్లిన రుబ్లెవ్‌కు మూడో సెట్లో బ్రేక్‌ పడింది. వరుసగా మూడు సెట్లు ఓడి టోర్నీ నుంచి నిష్క్రమించాడు. 11వ సీడ్‌ కచనోవ్‌ (రష్యా) 6-4, 6-1, 3-6, 7-6 (7-5)తో కొకినాకిస్‌ (ఆస్ట్రేలియా)పై, సెబాస్టియన్‌ (ఆస్ట్రియా) 5-7, 6-3, 7-5, 1-6, 6-4తో ఫాగ్నిని (ఇటలీ)పై నెగ్గారు.

పెగులాకు షాక్‌..: మహిళల సింగిల్స్‌లో మూడో సీడ్‌ జెస్సికా పెగులా (అమెరికా)కు షాక్‌. మూడో రౌండ్లో ఆమె 1-6, 3-6 తేడాతో 28వ సీడ్‌ ఎలీస్‌ మార్టిజ్‌ (బెల్జియం) చేతిలో చిత్తయింది. ఈ మ్యాచ్‌లో ఆరంభం నుంచి మార్టిజ్‌దే జోరు. తొలి సెట్‌ రెండు, నాలుగో గేమ్‌ల్లో ప్రత్యర్థి సర్వీస్‌ బ్రేక్‌ చేసి, ఆపై 5-0తో దూసుకెళ్లిన ఆమె.. అలవోకగా గెలిచింది. రెండో సెట్లో 3-3 వరకు పోరు హోరాహోరీగా సాగింది. కానీ అక్కడి నుంచి మళ్లీ మార్టిజ్‌దే ఆధిపత్యం. వరుసగా మూడు గేమ్‌లు నెగ్గిన ఆమె విజేతగా నిలిచింది. ఈ పోరులో మార్టిజ్‌ 20 ఏస్‌లు కొట్టింది. రెండో సీడ్‌ సబలెంక (బెలారస్‌) ప్రిక్వార్టర్స్‌ చేరింది. మూడో రౌండ్లో ఆమె 6-2, 6-2తో రకిమోవా (రష్యా)పై గెలిచింది. ఈ మ్యాచ్‌లో 6 ఏస్‌లు కొట్టిన సబలెంక.. 27 విన్నర్లు సంధించింది. తొమ్మిదో సీడ్‌ కసత్కిన (రష్యా) 6-0, 6-1తో స్టెర్న్స్‌ (అమెరికా)పై, స్వితోలినా (ఉక్రెయిన్‌) 2-6, 6-2, 7-5తో బ్లింకోవా (రష్యా)పై, స్టీఫెన్స్‌ (అమెరికా) 6-3, 3-6, 6-2తో పుతింత్సెవా (కజకిస్థాన్‌)పై నెగ్గారు. పవ్లిచెంకోవా, ఎలీనా (రష్యా) కూడా ముందంజ వేశారు.
యుకి జోడీకి నిరాశ: పురుషుల డబుల్స్‌లో భారత జోడీ యుకి బాంబ్రి- సాకేత్‌ మైనేనికి నిరాశే ఎదురైంది. రెండో రౌండ్లో యుకి- సాకేత్‌ జంట 4-6, 5-7 తేడాతో గొంజాలెజ్‌ (మెక్సికో)- రోజర్‌ (ఫ్రాన్స్‌) చేతిలో ఓడింది.