Ben Stokes: స్టోక్స్‌ వస్తున్నాడు.. రాత మారేనా?

నేడు దక్షిణాఫ్రికాతో ఇంగ్లాండ్‌ పోరు

ముంబయి: ఒకటేమో డిఫెండింగ్‌ ఛాంపియన్‌ ఇంగ్లాండ్‌. మరొకటేమో ఆల్‌రౌండ్‌ ప్రదర్శనతో బలంగా కనిపిస్తున్న దక్షిణాఫ్రికా. కానీ ప్రపంచకప్‌లో ఈ రెండూ చిన్న జట్ల చేతుల్లో అనూహ్య పరాజయాలు చవిచూశాయి. ఇంగ్లాండ్‌ను అఫ్గానిస్థాన్‌ ఓడించగా.. దక్షిణాఫ్రికాపై నెదర్లాండ్స్‌ గెలిచింది. ఇప్పుడీ ఓటములను దాటి టోర్నీలో ముందుకు సాగే దిశగా విజయంపై కన్నేసిన ఈ జట్లు శనివారం పరస్పరం తలపడనున్నాయి. ఈ కప్పులో ఇంగ్లాండ్‌ ప్రయాణం ఒడుదొడుకులతో సాగుతోంది. ఆరంభ మ్యాచ్‌లో కివీస్‌ చేతిలో ఓడిన ఆ జట్టు.. అనంతరం బంగ్లాదేశ్‌పై నెగ్గింది. గత మ్యాచ్‌లో అఫ్గాన్‌ వీరుల ముందు తలవంచింది. సఫారీ జట్టుతో మ్యాచ్‌లో స్టార్‌ ఆల్‌రౌండర్‌ స్టోక్స్‌ పునరాగమనం చేసే అవకాశాలుండటం ఇంగ్లిష్‌ జట్టుకు ఉత్సాహాన్నిచ్చేదే. తుంటి గాయంతో అతను తొలి మూడు మ్యాచ్‌లకు దూరమయ్యాడు. మరోవైపు ఆస్ట్రేలియా, శ్రీలంకను 100కు పైగా పరుగుల తేడాతో ఓడించిన దక్షిణాఫ్రికా డచ్‌ జట్టుకు దాసోహమంది. టోర్నీ చరిత్రలోనే అత్యధిక స్కోరు (428/5) చేసిన ఆ జట్టు నెదర్లాండ్స్‌పై ఛేదనలో విఫలమైంది. ఇప్పుడు ఇంగ్లాండ్‌పై గెలవాలని చూస్తున్న ఆ జట్టుకు డికాక్‌, మార్‌క్రమ్‌, వాండర్‌ డసెన్‌, రబాడ, జాన్సన్‌, మిల్లర్‌ కీలకం.