india vs south africa: సచిన్‌ రికార్డును సమం చేసిన విరాట్.. దక్షిణాఫ్రికా లక్ష్యం 327

ఇంటర్నెట్ డెస్క్‌: స్టార్‌ బ్యాటర్ విరాట్ కోహ్లీ 101* (121 బంతుల్లో 10 ఫోర్లు) శతకంతో అదరగొట్టిన వేళ భారత జట్టు 327 పరుగుల లక్ష్యాన్ని దక్షిణాఫ్రికా ముందుంచింది. టాస్‌ గెలిచి బ్యాటింగ్‌కు దిగిన భారత్‌ నిర్ణీత 50 ఓవర్లలో 5 వికెట్ల నష్టానికి 326 పరుగులు చేసింది. పుట్టిన రోజున కోహ్లీ వన్డేల్లో తన 49వ శతకాన్ని పూర్తి చేసుకోవడం విశేషం. దీంతో సచిన్‌ రికార్డు (49)ను సమం చేశాడు. విరాట్‌తోపాటు శ్రేయస్‌ అయ్యర్ 77 (87 బంతుల్లో 7 ఫోర్లు, 2 సిక్స్‌లు) కీలక పరుగులు సాధించాడు. ఆఖర్లో సూర్యకుమార్‌ యాదవ్ (22: 14 బంతుల్లో 5 ఫోర్లు), జడేజా (29; 15 బంతుల్లో 3 ఫోర్లు, ఒక సిక్స్‌) దూకుడుగా ఆడేశారు. 

అద్భుత భాగస్వామ్యం..

ఓపెనర్లు రోహిత్ శర్మ (40), శుభ్‌మన్‌ గిల్ (23) తొలి వికెట్‌కు 62 పరుగులు జోడించారు. రోహిత్ ఔటైన కాసేపటికే గిల్ కూడా పెవిలియన్‌కు చేరాడు. ఈ క్రమంలో దక్షిణాఫ్రికా బౌలర్లు కట్టుదిట్టంగా బంతులను సంధించడంతో పరుగుల రాక కష్టంగా మారింది. దీంతో విరాట్-శ్రేయస్‌ ఆచితూచి ఆడారు. మూడో వికెట్‌కు 134 పరుగులు జోడించారు. కానీ, మరోసారి సఫారీ జట్టు బౌలర్లు పుంజుకోవడంతో శ్రేయస్‌తోపాటు కేఎల్ రాహుల్ (8) పెవిలియన్‌కు చేరారు. కానీ, విరాట్-సూర్య దూకుడు ఆడి స్కోరుబోర్డును పరుగులు పెట్టించారు. సూర్య ఔటైన తర్వాత క్రీజ్‌లోకి వచ్చిన జడేజా కూడా వేగంగా పరుగులు సాధించాడు. ఈ క్రమంలో కోహ్లీ శతకం పూర్తి చేసుకున్నాడు. దక్షిణాఫ్రికా బౌలర్లు ఎంగిడి, జాన్‌సెన్, రబాడ, కేశవ్, షంసీ తలో వికెట్ తీశారు.