Jasprit Bumrah: ఒక్క వికెట్టే పడగొట్టినా.. చరిత్ర సృష్టించాడు..

ఇంటర్నెట్ డెస్క్‌: ప్రపంచకప్‌లో టీమ్ఇండియా వరుసగా ఏడో విజయాన్ని నమోదు చేసింది. శ్రీలంకపై 302 పరుగుల తేడాతో భారీ విజయం సాధించి సెమీస్‌కు చేరుకుంది. తొలుత బ్యాటింగ్ చేసిన భారత్.. నిర్ణీత 50 ఓవర్లలో 8 వికెట్ల నష్టానికి 357 పరుగులు చేసింది. ఈ భారీ లక్ష్యఛేదనలో భారత పేసర్ల ధాటికి లంక.. 55 పరుగులకే కుప్పకూలింది. షమి ఐదు వికెట్లతో మరోసారి సత్తాచాటగా.. మహ్మద్‌ సిరాజ్ 3, జస్‌ప్రీత్‌ బుమ్రా, రవీంద్ర జడేజా ఒక్కో వికెట్ పడగొట్టారు. ఈ మ్యాచ్‌లో జస్‌ప్రీత్ బుమ్రా (Jasprit Bumrah) ఒకే వికెట్ పడగొట్టినా ప్రపంచకప్‌లో చరిత్ర సృష్టించాడు. వరల్డ్ కప్‌లో ఇన్నింగ్స్ తొలి బంతికే వికెట్ తీసిన మొదటి భారత బౌలర్‌గా బుమ్రా రికార్డుల్లోకెక్కాడు. శ్రీలంక బ్యాటర్ పాథుమ్ నిశాంకను ఎల్బీడబ్ల్యూగా వెనక్కి పంపి అతడు ఈ ఘనత అందుకున్నాడు.